Վաշինգտոնում ԱՄՆ Կոնգրեսի շենք են ներխուժել Պաղեստինին աջակցող ցուցարարները։ Տեղեկությունը հայտնում են ամերիկյան լրատվամիջոցները։
Ավելի վաղ հաղորդվել էր, որ ցուցարարները հանրահավաք են անցկացնում ԱՄՆ մայրաքաղաքում: Խաղաղ ցույցը վերածվել է ոստիկանության հետ բախումների։ Հանրահավաքի մասնակիցներին հաջողվել է ճեղքել ոստիկանական պատնեշը և ներխուժել Կապիտոլիումի մասնաշենքերից մեկը։
Իրավապահների տվյալներով՝ բողոքի ակցիայի մասնակիցներից երեքը բերման են ենթարկվել իրավապահների վրա հարձակվելու համար։
Կապիտոլիումի ոստիկանությունը հայտնում է, որ հարևանությամբ գտնվող Ներկայացուցիչների պալատի գրասենյակի շենքի նախասրահում ձերբակալությունները շարունակվում են:
«Մենք ցուցարարներին հորդորել էինք դադարեցնել իրենց գործողությունները, նրանք չենթարկվեցին, մենք սկսեցինք ձերբակալել նրանց»,- ասված է X-ում հրապարակված հաղորդագրությունում։
Իրավապահներն ընդգծում են, որ Կոնգրեսի շենքերի ներսում ցույցերն արգելված են։
Հիշեցնենք` հոկտեմբերի 7-ի առավոտյան Իսրայելը Գազայի հատվածից աննախադեպ հրթիռային հարձակման ենթարկվեց։ Իսրայելի բանակի մամուլի ծառայությունից հայտնեցին, որ ծայրահեղականներն ավելի քան 3 հազար հրթիռ են արձակել: Բացի այդ, տասնյակ ահաբեկիչներ ներխուժել են Իսրայելի հարավում գտնվող սահմանամերձ շրջաններ։ Պաղեստինյան ՀԱՄԱՍ շարժման ռազմական թևը հայտարարեց, որ Իսրայելի դեմ «Ալ Աքսայի ջրհեղեղ» գործողություն է անցկացնում: Իսրայելի պաշտպանության բանակն էլ (ՑԱԽԱԼ) հայտնեց Գազայի հատվածում ՀԱՄԱՍ-ի դեմ «Երկաթե թրեր» գործողության մեկնարկի մասին: