ԵՐԵՎԱՆ, 19 հոկտեմբերի – Sputnik. Այս պահին Հայաստանում սուր շնչառական վարակների բարձր ակտիվություն կա։ ՀՀ առողջապահության նախարարությունը հայտնում է, որ հիվանդացությունը համաճարակային շեմից բարձր է 1,3 անգամ, իսկ նախորդ տարվա միևնույն ժամանակահատվածի համեմատ՝ 1,6 անգամ։
Ավելացել է ինչպես ամբուլատոր պոլիկլինիկական, հիվանդանոցներ դիմելիությունը, այլև շտապօգնության կանչերը։
«Ըստ տարիքային խմբերի վերլուծությունը փաստում է, որ հիվանդացության 70%-ն արձանագրվել է մինչև 18 տարեկանների շրջանում, որից 57%-ը՝ մինչև 4 տարեկանների։ Գրիպով չհիվանդանալու, ինչպես նաև հիվանդության բարդություններից խուսափելու լավագույն միջոցը պատվաստումն է»,– նշում է գերատեսչությունը։
Նախարարությունը հիշեցնում է, որ հանրապետության բոլոր պոլիկլինիկաներն ու ամբուլատորիաներն ապահովված են սեզոնային գրիպի պատվաստանյութով։
Պատվաստումները կատարվում են կամավորության սկզբունքով, անվճար, պետական պատվերի շրջանակում։