ՀՀ կառավարությունը կպաշտպանի մատակարարներին և կսահմանափակի սուպերմարկետների լիազորությունը

ԵՐԵՎԱՆ, 19 հոկտեմբերի – Sputnik. Հայաստանյան սուպերմարկետներին կարգելվի հետաձգել մատակարարների վճարումները և նրանցից բոնուսային վճարումներ գանձել։ «Տնտեսական մրցակցության պաշտպանության մասին» և «Առևտրի և ծառայությունների մասին» օրենքներում փոփոխությունների փաթեթն այսօր հավանության արժանացավ ՀՀ կառավարության նիստում և առաջիկայում կներկայացվի Ազգային ժողովի քննարկմանը:

Արդյունքում, լինում են դեպքեր, երբ որոշ սուպերմարկետներ անորոշ ժամանակով հետաձգում են մատակարարների վճարումները։ Կան դեպքեր, երբ մատակարարներից պահանջվում է լրացուցիչ վճարումներ ապրանքների` արդյունավետ վաճառքի համար:

Նախագծով առաջարկվում է սուպերմարկետների համար սահմանել վճարման առավելագույն ժամկետ՝ 30 օր պարենային ապրանքների և 60 օր ոչ պարենային ապրանքների համար։

Ավելին, նախագիծը ցանցերին հանձնարարում է իրենց պաշտոնական կայքերում հրապարակել մատակարարներից ապրանքների ընդունման սկզբունքները` ըստ որակի, ուղեկցող փաստաթղթերի և այլն, ինչպես նաև դարակներում ապրանքների տեղադրման պայմանները։

Նշենք, որ 30–60 օրվա ժամկետներն այժմ էլ ամրագրված են պայմանագրերում, սակայն առևտրային ցանցերը հնարավորություն ունեն վճարումներ կատարել իրենց հայեցողությամբ։ Որպես կանոն` մատակարարները ռիսկի չեն դիմում դատի տալ նրանց՝ վախենալով ընդմիշտ փչացնել հարաբերությունները առևտրային ցանցի հետ և կորցնել եկամուտը: Այսպիսով, մատակարարները պարզապես հույսը դնում են ցանցի սեփականատերերի և մենեջերների բարեխղճության վրա։

Խախտումների ստուգումն այժմ շատ ավելի հեշտ է, քան 5–10 տարի առաջ, քանի որ բիզնեսի ամբողջ փաստաթղթաշրջանառությունը դարձել է էլեկտրոնային, և գործարքի ամսաթվով և վճարման ժամկետներով ցանկացած հաշիվ–ապրանքագիր կարելի է հեշտությամբ ստուգել:

Բոլոր տվյալները հավաքագրվում են պետական եկամուտների կոմիտեի սերվերներում, քանի որ հենց նա է հետևում բիզնեսի շրջանառությանը։