ԵՐԵՎԱՆ, 19 հոկտեմբերի – Sputnik. ԵԱՏՄ երկրներում շուրջ 8,7 մլն միավոր կեղծ ապրանք է բացահայտվել, այդ թվում` հագուստ, կոշկեղեն, խաղեր և խաղալիքներ, ավտոմեքենայի պահեստամասեր, տպագիր և դեղագործական արտադրանք։ Այս մասին հայտարարվել է մտավոր սեփականության հարցերով խորհրդատվական խորհրդի նիստում։ Տեղեկությունը հայտնում է Եվրասիական տնտեսական հանձնաժողովի մամուլի ծառայությունը։
Հանձնաժողովի` տնտեսության և ֆինանսական քաղաքականության գծով ներկայացուցիչներն ընդգծել են, որ 2022 թվականին ԵԱՏՄ պետություններում 6054 խախտում է արձանագրվել մտավոր սեփականության ոլորտում։
«Հանձնաժողովը ԵԱՏՄ երկրների իրավասու մարմինների հետ համատեղ հնարավոր ամեն բան անում է բարեխիղճ արտադրողներին և սպառողներին կեղծիքներից պաշտպանելու համար, որոնք կարող են վտանգավոր լինել մարդկանց կյանքի և առողջության համար», – նշվում է հաղորդագրության մեջ։
Նիստի ընթացքում խոսվել է համացանցում ապրանքային նշանների, սպասարկման նշանների և Միության ապրանքների ծագման վայրերի անվանումների, մտավոր սեփականության իրավունքների խախտման դեմ պայքարի համաձայնեցված մոտեցումների ձևավորման մասին պայմանագրի իրագործման մասին։
Որոշվել է, որ հանձնաժողովը 2019-2023 թվականների վերաբերյալ ակնարկ կպատրաստի, որում կներկայացվեն մտավոր սեփականության ոլորտի զարգացման համաշխարհային հիմնական միտումները, կանցկացվի անդամ պետությունների օրենսդրության համեմատական վերլուծություն և կմշակվեն համապատասխան առաջարկություններ: