Հաջորդ տարի հայաստանյան 270 դիմորդներ կկարողանան անվճար կրթություն ստանալ ՌԴ–ում

ԵՐԵՎԱՆ, 18 հոկտեմբերի – Sputnik. Հայաստանից 270 դիմորդ կկարողանա 2024-2025 ուսումնական տարում անվճար կրթություն ստանալու Ռուսաստանի Դաշնությունում։ Այս մասին Sputnik Արմենիա մուլտիմեդիոն մամուլի կենտրոնում հայտնեց Հայաստանում Ռոսսոտրուդնիչեստվոյի ներկայացուցչության (Հայաստանում Ռուսական տուն) ռուսաց լեզվի գծով նախագծերի և կրթական ծրագրերի համակարգող Այգուլ Շամսուտդինովան։

Շամսուտդինովան հավելեց, որ նախորդ տարի 250 քվոտա էր հատկացվել։ Նա նշեց, որ մեկ տարի առաջ ամենապահանջված ուղղություններն էին բժշկությունը, ՏՏ–ն, իրավաբանությունը և զբոսաշրջության ոլորտը։ Նրա խոսքով` բժշկական բուհերի 16 տեղի համար 50-60 մարդ էր հավակնում։ Շամսուտդինովան նշեց, որ բոլոր ուսանողները հանրակացարան և կրթաթոշակ (որը առաջադիմությունից կախված կավելանա կամ կկրճատվի) են ստանում։

«Հայտերի ընդունումը պետք է ավարտվեր նոյեմբերի 1-ին, սակայն մենք որոշեցինք երկարացնել ժամկետը մինչև դեկտեմբերի 1-ը։ Ժամանակ կա, բայց խորհուրդ ենք տալիս չհապաղել։ Եկեք կոնսուլտացիաների և լրացրեք հայտերը», – ասաց ծրագրի համակարգողը։

Հայաստանում Ռոսսոտրուդնիչեստվոյի ներկայացուցչության ռուսաց լեզվի գծով նախագծերի և կրթական ծրագրերի համակարգողի օգնական Մարիա Ավանեսովան իր հերթին նկատեց, որ ծրագրում ներառված է ոչ միայն բարձրագույն, այլև միջին և լրացուցիչ մասնագիտական կրթությունը։ Այսինքն` 9-րդ դասարանի աշակերտներն արդեն կարող են հայտ ներկայացնել, որպեսզի հաջորդ տարի շարունակեն ուսումը ՌԴ–ում։ Ընդ որում` կարող են դիմել ոչ միայն Հայաստանի բնակիչները, այլև ԼՂ–ից բռնի տեղահանվածները։

Նա հավելեց, որ դիմորդների շրջանում կան զորակոչի տարիքի տղամարդիկ, որոնք ընդունվելուց հետո ակադեմիական արձակուրդի հնարավորություն են ստանում։ Այսինքն` նրանց համար պահպանվում է անվճար քվոտան, և բանակից հետո նրանք կարող են շարունակել ուսումը ռուսական բուհում։

Հիշեցնենք, որ նախագծի վերաբերյալ տեղեկատվությանը կարելի է հետևել Երևանում Ռուսական տան` սոցցանցերում գործող պաշտոնական էջերում։