ԵՐԵՎԱՆ, 11 հոկտեմբերի – Sputnik. «Բացահայտիր Հայաստանը երկնքից» օդագնացության միջազգային փառատոնն այս տարի կանցկացվի հոկտեմբերի 14-18-ը: Ասուլիսում այս մասին հայտնեց Զբոսաշրջության կոմիտեի ղեկավար Սիսիան Պօղոսեանը:
«Մեզ համար կարևոր է արկածային տուրիզմի զարգացումը, և մենք ջանքեր ենք գործադրում այդ ուղղությամբ։ Ուրախ ենք, որ փառատոնը կանցկացվի 5-րդ անգամ, և մեկ շաբաթվա ընթացքում մենք արդեն հայտեր ենք ստացել տարբեր երկրների մասնակիցներից։ Դա չի կարող չուրախացնել մեզ»,-նշեց նա։
«SkyBall»-ի կազմակերպիչ և տնօրեն Նաիրի Բարսեղյանն իր հերթին նշեց, որ փառատոնին մասնակցելու են 10 երկրի 20 օդապարիկների անձնակազմեր:
Բարսեղյանի խոսքով՝ մասնակիցների աշխարհագրությունն ընդլայնվել է` Հայաստան կժամանեն Բրազիլիայից, Գերմանիայից, Մեծ Բրիտանիայից, Լիտվայից, Բուլղարիայից, Վրաստանից, Ճապոնիայից, Ռուսաստանից և Հայաստանից:
«Բրազիլացի օդաչուն աղջիկ է և էթնիկ հայ, ռուս օդաչուն նույնպես հայ է», - ասաց նա:
Նրա խոսքով՝ առաջին թռիչքը տեղի կունենա հոկտեմբերի 14-ին՝ ժամը 07.00-ին, իսկ երկրորդը՝ 17։00–ին, Հանրապետության հրապարակից:
Հոկտեմբերի 16-17–ին նախատեսվում են թռիչքներ Գառնիի տարածքում։ Իսկ վերջին թռիչքը նախատեսված է հոկտեմբերի 18-ին, որը տեղի կունենա Ապարանի ջրամբարի տարածքից:
Բարսեղյանը հավելեց, որ բոլոր օդաչուները կստանան առաջադրանքներ, դրանց արդյունքներով` մրցանակներ:
«Թռիչքներից մեկի ուղևորները կլինեն 6-12 տարեկան արցախցի երեխաները։ Մենք շուտով մանրամասներ կներկայացնենք», - ասաց նա:
Առաջին անգամ փառատոնը Հայաստանում անցկացվել է 2017 թվականին։ Կազմակերպիչների նպատակն է տարեցտարի մեծացնել միջոցառման ծավալները, սակայն Բարսեղյանի խոսքով` այդ առումով խնդրի են բախվում, քանի որ զբոսաշրջիկներից շատերը չեղարկում են հայաստանյան այցելությունները։
Նշենք, որ 2023 թվականի հունվար-սեպտեմբերին Հայաստան է այցելել 1 մլն 850 հազար զբոսաշրջիկ։ Շուրջ 51%-ը եկել է Ռուսաստանից, մոտ 10%–ը՝ Վրաստանից, 6%-ը՝ Իրանից։ Եվս 3 տոկոսը Հայաստան է եկել ԱՄՆ-ից է, 1-ական տոկոս՝ Ֆրանսիայից, Գերմանիայից, Հնդկաստանից, Չինաստանից, Բելառուսից և Ուկրաինայից։