ԵՐԵՎԱՆ, 7 հոկտեմբերի – Sputnik. Բելգիայի Անտվերպեն քաղաքում ընթացող սպորտային մարմնամարզության աշխարհի առաջնությունում Հայաստանի հավաքականի մարմնամարզիկներ Հարություն Մերդինյանին ու Վահագն Դավթյանին չնչին միավորներ չբավականացրին պատվո պատվանդանին կանգնելու համար։ Նրանք 4-րդն են։
Հայաստանի հավաքականը Անվերպեն է մեկնել 5 մարմնամարզիկներով, որոնցից 4-ը առանձին վարժություններում դուրս են եկել եզրափակիչ ու պայքարում էին մեդալների համար։ Միայն երիտասարդ Գագիկ Խաչիկյանին չհաջողվեց հանդես գալ եզրափակիչներից մեկում։
Նժույգ թափերի վրա Եվրոպայի կրկնակի չեմպիոն Հարություն Մերդինյանին շատերը վետերան են համարում։ Բայց 39-ամյա մարմնամարզիկը հերթական անգամ փայլեց իր վարպետությամբ։ Իր առանցքային համարվող գործիքի՝ նժույգ թափերի վրա Հարությունը շատ մոտ էր ևս մեկ մեդալ վաստակելուն, բայց զբաղեցրեց 4-րդ տեղը։
Մեդալին շատ մոտ էր նաև Վահագն Դավթյանը, որը եզրափակիչում գերազանց հանդես եկավ ու մրցավարների կողմից արժանացավ 14, 700 գնահատականի։ Բայց մրցակիցներից երեքին հաջողվեց շրջանցել մեր մարմնամարզիկին, ու նա նույնպես զբաղեցրեց 4-րդ տեղը։
Այս վարժությունում 7-րդ տեղը զբաղեցրեց մեր ընտրանու մյուս ներկայացուցիչը՝ Արթուր Ավետիսյանը։
Վաղը Անտվերպենի մարզադահլիճում անցկացվելու են հենացատկի մրցումները։ Հայաստանը եզրափակիչում ներկայացնելու է այս վարժության աշխարհի գործող չեմպիոն Արթուր Դավթյանը, որը որակավորման մրցումներում փայլուն է հանդես եկել։