ԵՐԵՎԱՆ, 6 հոկտեմբերի – Sputnik. Արցախից բռնի տեղահանված անձանց այսօրվանից կփոխանցվի պետության տրամադրած 100 000 դրամ միանվագ օգնությունը։ Հումանիտար կենտրոնում տեղի ունեցած ճեպազրույցի ժամանակ տեղեկությունը հայտնեց ՀՀ վարչապետի մամուլի խոսնակ Նազելի Բաղդասարյանը։
Նա տեղեկացրեց, որ ՀՀ կենտրոնական բանկն արդեն առավել քան 50 000 անձի բանկային քարտային տվյալներ է փոխանցել միասնական սոցիալական ծառայություն։ Այժմ տեղի է ունենում տվյալների համադրման գործընթաց։
Բաղդասարյանը բանկային հաշիվ չունեցողներին հորդորեց այսօրվա աշխատանքային օրը բաց չթողնել և լուծել այդ հարցը գումարները ստանալու համար։
Հիշեցնենք` Արցախից տեղահանվածներին ՀՀ բյուջեից հատկացվելու է միանվագ 100-հազարական դրամ։ Բացի այդ, յուրաքանչյուր ընտանիքի բնակության ծախսերը հոգալու համար մեկ անձի հաշվով տրամադրվելու է ամսական 40 հազար դրամ։ Յուրաքանչյուր անձի տրվելու է նաև ամսական 10 000 դրամ կոմունալ բոլոր ծախսերի համար։ Աջակցության վերջին երկու տեսակներից չեն կարողանա օգտվել այն ընտանիքները, որոնք անշարժ գույք ունեն ՀՀ տարածքում։