ԵԱԶԲ–ի երկրները` ներառյալ ՀՀ–ն, կկարողանան բանկի հաշիվները համալրել ազգային արժույթներով

ԵՐԵՎԱՆ, 5 հոկտեմբերի – Sputnik. Եվրասիական զարգացման բանկի շահառու երկրները կկարողանան բանկի հաշիվները համալրել ազգային արժույթներով։ Եվրասիական կայունացման և զարգացման հիմնադրամի մասին 2009 թ. ստորագրված պայմանագրում համապատասխան փոփոխություններ կատարելու մասին արձանագրությունը հավանության է արժանացել ՀՀ կառավարության այսօրվա նիստում:

Նախկինում հիմնադրամի միջոցները ձևավորվում և տրամադրվում էին դոլարով կամ եվրոյով։ Պայմանագրում ազգային արժույթների օգտագործման հնարավորություն նախատեսված չէր։ Այդ պատճառով ԵԱԶԲ շահառու երկրները որոշում են կայացրել լրացնել այդ բացը և ստեղծել նոր հնարավորություն։

Հիշեցնենք, որ հիմնադրամից հատկացվում են և՛ դրամաշնորհներ, և՛ վարկեր։ Դրամաշնորհները տրամադրվում են տեխնիկական աջակցության ծրագրերին, վարկերը՝ խոշոր նախագծերին, որոնք համակարգային կարևորություն ունեն ազգային տնտեսությունների համար։

ՀՀ–ում Եվրասիական կայունացման և զարգացման հիմնադրամի վարկային ծրագրերը ներառում են «Հյուսիս–Հարավ» ավտոմայրուղու շրջանակներում Ագարակ–Քաջարան հատվածի կառուցումը` 150 մլն դոլար, ինչպես նաև ոռոգման համակարգերի արդիականացումը 40 մլն դոլար:

Հիշեցնենք, որ ԵԱԶԲ–ի ընդհանուր ծավալը կազմում է 8 մլրդ 513 մլն դոլար։ ՀՀ ներդրումը կազմում է 1 մլն դոլար։ 2023 թ. ապրիլին Հայաստանը ԵԱԶԲ–ում իր մասնակցությունը 0,07%–ից ավելացրել է մինչև 4,23%:

Հայաստանում ԵԱԶԲ–ի ծրագրերը պետական հատվածում ներառում են դպրոցների սեյսմակայունության բարձրացումը, մասնավոր հատվածում տրամադրվում են վարկեր «Հարավկովկասյան երկաթուղուն», Eremyan Projects ընկերությանը, «Կասկադ էներգոյին», որը կազմում է «Տաշիր» հոլդինգի մի մասը, և այլն: