ԵՐԵՎԱՆ, 3 հոկտեմբերի – Sputnik. Հայաստանը որևէ հիմք չունի ենթադրելու, որ Հռոմի ստատուտի վավերացման դեպքում Ռուսաստանը որոշակի քայլեր կձեռնարկի։ Այս մասին լրագրողների հետ ճեպազրույցում ասաց ՔՊ–ական պատգամավոր Էդուարդ Աղաջանյանը` անդրադառնալով հարցին, որ այդ փաստաթղթի վավերացումից հետո,Ռուսաստանը կարող է կտրուկ քայլեր անել, իսկ Հայաստանն էլ կախվածության մեջ է։
«Բազմիցս կրկնել ենք, որ սա (Հռոմի ստատուտը. խմբ.) որևէ առնչություն չունի Ռուսաստանի հետ մեր երկկողմանի հարաբերությունների տեսանկյունից։ Մենք այս դիրքորոշումը փոխանցվել ենք նաև ռուս գործընկերներին։ Այս հարցի շուրջ տարբեր արձագանքներից մեր դիրքորոշումը չի փոխվում, քանի որ Հայաստանի Հանրապետությունը սուվերեն պետություն է և պետք է առաջնորդվել բացառապես ՀՀ պետական շահերով»,– ասաց Աղաջանյանը։
Իշխանական պատգամավորը նաև շեշտեց` եթե անգամ Ռուսաստանը որոշակի քայլեր ձեռնարկի, Հայաստանի ղեկավարությունը բնականաբար քննարկել է տարբեր հնարավոր սցենարներ։ Անհրաժեշտության դեպքում համապատասխան քայլեր կձեռնարկվեն։
Հիշեցնենք` Հայաստանը Միջազգային քրեական դատարանի Հռոմի կանոնադրությունը ստորագրել էր 1999թ–ի հոկտեմբերի 1-ին, սակայն չէր վավերացրել։ Գործընթացն ընդհատվել էր 2004թ–ի օգոստոսի 13-ին, երբ փաստաթուղթը ճանաչվել էր ՀՀ Սահմանադրությանը հակասող։
ՀՀ սահմանադրական դատարանը մարտի 24-ին որոշեց, որ Հայաստանի միացումը միջազգային քրեական դատարանի Հռոմի կանոնադրությանը համապատասխանում է գործող Սահմանադրությանը։
Սեպտեմբերի 13-ին ՀՀ վարչապետ Նիկոլ Փաշինյանը հայտարարեց, որ Հռոմի ստատուտը վավերացվելու է իր դիրքորոշմամբ և խորհրդարանական գործընկերների լիարժեք աջակցությամբ։ Նա ընդգծեց, որ այն ոչ մի կապ չունի Հայաստան–Ռուսաստան հարաբերությունների հետ։
ՀՀ ԱԺ պետական-իրավական հարցերի մշտական հանձնաժողովը սեպտեմբերի 28-ին դրական եզրակացություն տվեց միջազգային քրեական դատարանի Հռոմի կանոնադրության վավերացման նախագծին։ Փաստաթուղթը կքննարկվի խորհրդարանի լիագումար նիստում։
ՌԴ ԱԳՆ–ից հայտարարել են, որ Հայաստանի կողմից Հռոմի ստատուտը վավերացնելու որոշումն ամենաբացասական հետևանքները կունենա երկկողմ հարաբերությունների վրա։