ԵՐԵՎԱՆ, 2 հոկտեմբերի – Sputnik. Ալավերդիում կասեցվել է «Պանիր Լոռի» արտադրատեսակի արտադրական գործունեությունը։ Տեղեկությունը հայտնում է ՀՀ սննդամթերքի անվտանգության տեսչական մարմինը։
ՀՀ ՍԱՏՄ Երևանի կենտրոնի տեսուչները պարզել են, որ արտադրությունն իրականացվում է հայրենական և ԵԱՏՄ իրավական նորմերի սանիտարահիգիենիկ պահանջների խախտմամբ:
Ստուգումներն իրականացվել են «Համով կաթ» ՍՊԸ–ին պատկանող կաթնամթերքի արտադրամասում։
«Մասնավորապես, պարզվել է, որ արտադրական շինության տարածքը չի եղել նորոգ վիճակում, չի կանխարգելվել կեղտի կուտակումն ու բորբոսի առաջացումը, մասնիկների թափվելու հնարավորությունը։ Բացի այդ, սննդի շղթայում ներգրավված աշխատողները չեն ենթարկվել պարտադիր պարբերական բժշկական զննությունների»,– նշված է ՍԱՏՄ հաղորդագրության մեջ:
«Համով կաթ» ՍՊԸ–ի «Պանիր Լոռի» արտադրատեսակի արտադրական գործունեությունը կասեցվել է մինչև վերացվեն հայտնաբերված խախտումները: