ԵՐԵՎԱՆ, 28 սեպտեմբերի – Sputnik. Հայաստանում Խորհրդային Միության փլուզումից հետո հանրային դիվանագիտություն չի եղել, հիմա ժամանակն է այդ սխալն ուղղելու, չնայած որ դա պետության գործն է։ Այս մասին ասուլիսի ժամանակ հայտարարեց Հայաստանի արևելագետների միության հիմնադիր նախագահ Արսեն Գասպարյանը։
«Մենք մեր միությունով որոշեցինք ստեղծել «Քաղաքացիական դիվանագիտություն» նախաձեռնությունը»,–ասաց նա։
Իր հերթին միության խորհրդի հիմնադիր անդամ Զարմինե Զեյթունցյանը մանրամասնեց, որ Խորհրդային Միության փլուզումից հետո համաշխարհային տեղեկատվական դաշտից կարծես թե Հայաստանը բացակայում է։
«Մենք տարիներ շարունակ փորձում ենք կառուցել կամ վերակառուցել մեր ազգային կերպարը` համաշխարհային հանրությանը մեկ ընդհանուր դիմագծով ներկայանալու համար, բայց դա կարծես թե դեռ չի ստացվում։ Պատճառները տարբեր են. բայց այդ ջանքերի փոշիացման հիմնական պատճառը հենց այս ինստիտուտի բացակայությունն է»,–ասաց նա։
Նրա խոսքով` իրենք մի քանի կարևոր խնդիրներ են վեր հանել, որոնք փորձելու ենք լուծել քաղաքացիական դիվանագիտության ճանապարհով։
Նախ այն, որ աշխարհում Հայաստանի մասին հստակ պատկերացման, ընկալումների և ընդհանրական կերպարի բացակայություն կա։ Միջազգային տիրույթում դրական հեղինակության ձեռքբերման և ամրապնդման հաղորդակցության համար ռազմավարական ծրագրերի բացակայությունն ակնհայտ է։ Երկրի բարենպաստ կերպարի ստեղծման, Հայաստանի գրավչության բարձրացման համար փափուկ ուժի կիրառման մեխանիզմների բացակայությունը ևս իր հետևանքներն է բերել։ Նաև համաշխարհային մշակույթի տիրույթում հայկական մշակույթի դերի և ամրապնդմանն ուղղված ստրատեգիական ծրագրերի բացահայություն կա։
Նա ընդգծեց, որ քաղաքացիական դիվանագիտությունը համակարգված և միասնական հանրային կարծիքի վրա ձևավորման գործիք է ներքին և միջազգային հանրության համար։
Այս նախաձեռնության շրջանակներում փորձելու են բարելավվել Հայաստանի և հայ ժողովրդի մասին ընկալումներն ու ըմբռնումները Կովկասի, Մերձավոր Արևելքի և Հարավային Ասիայի երկրների հանրության շրջանում։
Միության խորհրդի անդամ Արթուր Խաչիկյանն էլ նշեց, որ պետք է ակտիվացնել նաև միջազգային հարաբերություններով զբաղվող ուսանողական խորհրդի կապը։
«Դա թույլ կտա միավորել բոլոր ուսանողներին Հայաստանի բոլոր բուհերից, որոնք աշխատում են միջազգային անվտանգության բնագավառում։ Նրանց հնարավորություն կտրվի ներկայացնել իրենց աշխատանքները, որոնք կանցնեն որոշ մրցակցություն, որից հետո ուսանողները հնարավորություն կունենան դրանք ներկայացնելու միմյանց և դասախոսներին, հետագայում կդրվի դրանց հրատարակման հարցը»,–ասաց նա։
Նրա խոսքով` դա թույլ կտա ավելի պրոֆեսիոնալ, վերլուծական ձևով մոտենալ միջազգային անվտանգության խնդիրներին, որպեսզի ձևավորվի փորձագետների էլիտա, որոնք կկարողանան ճիշտ ձևով դատել ոչ միայն Հայաստանի անցյալի ու պատմության, այլև ներկայի ու ապագայի մասին։ Նրանք պետք է կարողանան տեսնել, թե ինչ է կատարվում Հայաստանի շուրջ և աշխարհում ։
Խաչիկյանը հավելեց, որ այժմ իր ուսանողների հետ թարգմանական աշխատանքներ են կատարում, որպեսզի հայերեն լեզվով հասանելի լինի ամենավերջին նյութերը, որպեսզի հնարավոր լինի դուրս գալ տարածաշրջանային մտածողությունից և անալիտիկ ձևով տեսնել աշխարհը։