ԵՐԵՎԱՆ, 27 սեպտեմբերի – Sputnik. ՀՀԿ փոխնախագահ Արմեն Աշոտյանի գործով քննությունը ՀՀ վերաքննիչ դատարանում ավարտվեց, որոշումը կհրապարակվի վաղը` սեպտեմբերի 28–ին ժամը 11–ին։ Ճեպազրույցի ժամանակ այս մասին ասաց Աշոտյանի փաստաբան Տիգրան Աթանեսյանը։
«Տեղի ունեցավ մի բան, որ ֆորմալ առումով բացառում է, որ Արմեն Աշոտյանին կարող են ազատ արձակել։ Այս ընթացքում դատախազը հասցրել է գործը հանձնել Հակակոռուպցիոն դատարան։ Այդ դեպքում, ըստ Վճռաբեկ դատարանի նախադեպի` ՀՀ վերաքննիչ դատարանն այլևս իրավունք չունի որոշում կայացնելու. Աշոտյանին ազատ արձակել–չարձակելու որոշումը թողնում է առաջին ատյանի դատարանի իրավասությանը»,– նշեց փաստաբանը։
Ըստ նրա` քննությունն այնքան ձգվեց, որ դատախազը հասցներ գործը հանձնել Հակակոռուպցիոն դատարան։
Հիշեցնենք` Արմեն Աշոտյանը երկու ամսով կալանավորվեց 2023 թ. հունիսի 16–ին։ Նա և Երևանի Հերացու անվան բժշկական համալսարանի նախկին ռեկտոր Միքայել Նարիմանյանը մեղադրվում են բուհին պատկանող մոտ 100 հազար դոլարի գույք հափշտակելու մեջ:
Նրանց մեղադրում են «Ծովասար» հյուրանոցային համալիրի քոթեջները ուռճացված գներով (հաջորդած «ատկատներով») ձեռք բերելու համար այն ժամանակահատվածում, երբ ՀՀԿ փոխնախագահը գլխավորել է բուհի հոգաբարձուների խորհուրդը: Աշոտյանի փաստաբանները ՀՀ վերաքննիչ բողոք էին ներկայացրել` փոխելու Աշոտյանի խափանման միջոց ընտրված կալանքը։