Անդրանիկ Թևանյանը կոչ է անում վաղվանից համազգային գործադուլ անել

ԵՐԵՎԱՆ, 25 սեպտեմբերի – Sputnik. «Մայր Հայաստան» դաշինքի առաջնորդ, Ազգային կոմիտեի անդամ Անդրանիկ Թևանյանը կոչ է անում վաղվանից համազգային գործադուլ անել` Արցախն ու Հայաստանը փրկելու համար։ Այս մասին նա այսօր հայտարարեց Հանրապետության հրապարակում հանրահավաքի ժամանակ։

Թևանյանը քաղաքացիներին նաև կոչ արեց առավոտյան 08:00–ից շարունակել անհնազանդության ակցիաները մայրաքաղաքում։

Մասնավորապես, Կենտրոն վարչական շրջանում՝ կրկեսի և մետրոյի «Երիտասարդական» կայարանի մոտ, Աջափնյակում` Կարեն Դեմիրճյանի անվան մարզահամերգային համալիրի դիմաց, Շենգավիթ վարչական շրջանում` Գարեգին Նժդեհի հրապարակում, Էրեբունիում` Սասունցի Դավթի հուշարձանի մոտ, Արաբկիրում`Սուրբ խաչ եկեղեցու մոտ և Կասյան փողոցում, Զեյթունում` «Երևան Սիթի» սուպերմարկետի հարակից տարածքում, Մալաթիա Սեբաստիայում` Անդրանիկի հուշարձանի մոտից և Նոր Նորքում` Գայի հուշարձանի մոտից։

Անդրանիկ Թևանյանը կոչ արեց նաև վաղը ժամը 13։30–ից 10 րոպեով դադարեցնել բոլոր մեքենաների շարժը փողոցներում։ Այսպես, նրա խոսքով, կլինի համազգային «քշադուլ»։

Ազգային կոմիտեի անդամը առաջադրված խնդրի իրականացման համար կարևորում է նաև այս ամբողջ գործընթացի մոբիլիզացումը։

Նա կոչ է անում մարդկանց ակտիվ լինել, որպեսզի կարողանան իշխանափոխության հասնել մինչև հոկտեմբերի 5-ը, քանի որ հենց այդ օրն է ազդարարվել Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումը Իսպանիայի Գրանադա քաղաքում:

Հիշեցնենք՝ սեպտեմբերի 19–ին Արցախի դեմ սանձազերծված ադրբեջանական նոր ագրեսիայի ֆոնին Երևանում մասշտաբային ցույցեր են սկսվել։ Մարդիկ պատասխան են պահանջում ՀՀ իշխանություններից Արցախի հարցում դրսևորած անգործության համար։

Համաժողովրդական շարժումը համակարգելու համար ազգային կոմիտե է ձևավորել, որում ընդգրկված են Հայկ Մամիջանյանը (Ազգային ժողովի «Պատիվ ունեմ» խմբակցության ղեկավար), Ավետիք Չալաբյանը («ՀայաՔվե» նախաձեռնության համահիմնադիր), Անդրանիկ Թևանյանը («Մայր Հայաստան» դաշինքի ղեկավար), Իշխան Սաղաթելյանը («Հայաստան» խմբակցության պատգամավոր)։