ԵՐԵՎԱՆ, 25 սեպտեմբերի - Sputnik. ԱՄՆ-ն մտադիր է Լեռնային Ղարաբաղի հարցով միջազգային առաքելություն ստեղծել, որը կհետևի տարածաշրջանի բնակիչների իրավունքների պահպանմանը: Այս մասին այսօր ճեպազրույցում հայտարարել է ԱՄՆ Պետական դեպարտամենտի մամուլի ծառայության ղեկավար Մեթյու Միլլերը, գրում է ՏԱՍՍ–ը։
«Մենք իսկապես կարծում ենք, որ պետք է լինի միջազգային առաքելություն, որը կապահովի Լեռնային Ղարաբաղի բնակիչների և միջազգային հանրության վստահությունն առ այն, որ նրանց իրավունքներն ու անվտանգությունը պաշտպանված են, ինչպես որ հայտարարել է Ադրբեջանը»,-ասել Է Միլլերը:
Միլլերն ասել է, որ դաշնակիցների և գործընկերների հետ աշխատում են այյդ ուղղությամբ։
Նա նշել է, որ ներկա պահին ակտիվ քննարկումներ են ընթանում նման առաքելության վերաբերյալ, և որ ԱՄՆ-ն ստեղծված իրավիճակում առավել կարևոր է համարում հրադադարի ռեժիմի պահպանումը, Լեռնային Ղարաբաղի ժողովրդի մարդասիրական կարիքների վրա ուշադրություն դարձնելը և Հայաստանի ու Ադրբեջանի կողմից խաղաղության մասին երկարաժամկետ համաձայնության ձեռքբերումը:
Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ադրբեջանական զինուժը շփման գծի ողջ երկայնքով խախտեց հրադադարը` հասցնելով հրթիռահրետանային հարվածներ։
Ադրբեջանի պաշտպանության նախարարությունը հայտարարեց, թե լոկալ բնույթի հակաահաբեկչական միջոցառումներ է անցկացնում։
Ադրբեջանական ագրեսիայի հետևանքով առնվազն 200 զոհ և ավելի քան 400 վիրավոր կա։
Սեպտեմբերի 20–ին հայտնի դարձավ, որ Արցախի իշխանություններն ընդունել են ՌԴ խաղաղապահ առաքելության զորակազմի հրամանատարության՝ կրակի դադարեցման վերաբերյալ առաջարկությունը:
Սեպտեմբերի 21–ին ՌԴ խաղաղապահների միջնորդությամբ ադրբեջանական Եվլախում կայացավ Արցախի ու Ադրբեջանի ներկայացուցիչների առաջին հանդիպումը։ 2–րդ հանդիպումը կայացել է սեպտեմբերի 25–ին Իվանյանում։