ԵՐԵՎԱՆ, 24 սեպտեմբերի – Sputnik. Ստեփանակերտում խմելու ջրից նմուշառումներ են կատարել, վտանգավոր նյութեր չեն հայտնաբերվել։ Այս մասին գրում է Արցախի տեղեկատվական շտաբը։
«Լաբորատոր ստուգումներն ընթացքում են, բայց մինչև այս պահը որևէ վտանգավոր նյութ չի հայտնաբերվել»,– նշված է հաղորդագրության մեջ։
Շտաբից հայտնում են, որ «Ջրմուղ-կոյուղի» ՓԲԸ-ն նմուշառում կատարելու որոշում է կայացրել քաղաքացիներից ստացված բազմաթիվ ահազանգերից հետո։
Նշենք, որ համացանցում տեղեկություններ էին տարածվել, թե ադրբեջանցիները դիզվառելիք են խառնել բնակչությանը մատակարարվող խմելու ջրին, որովհետև ջրամատակարարման ցանցը նրանց վերահսկողության տակ է անցել։
Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ադրբեջանական զինուժը շփման գծի ողջ երկայնքով խախտեց հրադադարը` հասցնելով հրթիռահրետանային հարվածներ։
Ադրբեջանի պաշտպանության նախարարությունը հայտարարեց, թե լոկալ բնույթի հակաահաբեկչական միջոցառումներ է անցկացնում։
Ադրբեջանական ագրեսիայի հետևանքով առնվազն 200 զոհ և ավելի քան 400 վիրավոր կա։
Սեպտեմբերի 20–ին հայտնի դարձավ, որ Արցախի իշխանություններն ընդունել են ՌԴ խաղաղապահ առաքելության զորակազմի հրամանատարության՝ կրակի դադարեցման վերաբերյալ առաջարկությունը:
Սեպտեմբերի 21–ին ՌԴ խաղաղապահների միջնորդությամբ ադրբեջանական Եվլախում կայացավ Արցախի ու Ադրբեջանի ներկայացուցիչների հանդիպումը։