Դիզվառելիքն ու բենզինը ՀՀ տնտեսության համար խիստ կարևոր ապրանքներ են, ու դրանց անխափան մատակարարումը կարևոր նշանակություն ունի երկրի տնտեսության համար։ Sputnik Արմենիայի եթերում նման տեսակետ հայտնեց Հայաստանի պետական տնտեսագիտական համալսարանի դոցենտ, տնտեսագետ Աղասի Թավադյանը` մեկնաբանելով ՌԴ կառավարության` բենզինի և դիզվառելիքի մատակարարումը ԵԱՏՄ երկրներ (այդ թվում` Հայաստան) շարունակելու մասին։
Հայտնել ենք, որ Ռուսաստանի կառավարությունը ս.թ. սեպտեմբերի 21-ից արգելել է բենզինի և դիզվառելիքի արտահանումը։ ԵԱՏՄ անդամ երկրների համար, սակայն, նախատեսվել են բացառություններ, և միության անդամ երկրները, այդ թվում` Հայաստանը, նախկինի պես շարունակելու են ՌԴ–ից հեղուկ վառելիք ստանալ։
«Դիզվառելիքն ու բենզինը պետության զարգացման համար շատ կարևոր են, որվհետև դրանք մտնում են բոլոր տնտեսական ապրանքների մեջ որպես հիմնածախս»,– ասաց տնտեսագետը։
Խոսելով Հայաստանում բենզինի բարձր գնի մասին` Թավադյանը հայտնեց, որ իրենք ուսումնասիրել են գնագոյացումը և պարզել, որ Հայաստանում վաճառվող բենզինի գնի վրա ազդող առաջին գործոնը տրանսպորտային ծախսերն են։
«Մինչև հասնում է Հայաստան, գինը թանկանում է»,– բացատրում է մասնագետը և հավելում, որ, ելնելով համաշխարհային տնտեսական իրողություններից ու ռուսաստանյան էներգակիրների նկատմամբ կիրառված սահմանափակումներից` Ռուսաստանը ստիպված է վաճառքի գները համապատասխանեցնել միջազգային շուկայի գներին։
«Հասկանում ենք, որ այս պահին համաշխարհային քաղաքականություն է գնում և փորձում են սահմանափակել ՌԴ–ից դիզվառելիքի, նավթի և բենզինի արտահանումը։ Ի պատասխան Ռուսաստանը սահմանափակում է արտահանումը, որպեսզի բենզինի գինը իր համար մրցունակ լինի միջազգային շուկայում»,– ասաց Թավադյանը` արձանագրելով, որ սա բացասաբար է ազդում նաև ՌԴ–ից հեղուկ վառելիք ներմուծող երկրների, այդ թվում` ՀՀ–ի վրա։
Նշենք, որ վերջին 1 տարվա ընթացքում ՀՀ–ից դեպի ԵԱՏՄ արտահանման ծավալը 5 տոկոսով գերազանցել է ԵԱՏՄ–ից ՀՀ ներմուծված ապրանքների ծավալը։
Ներմուծումը 12 ամսվա կտրվածքով կազմել է 3 մլրդ դոլար, արտահանումը` 2.85 մլրդ։