Համաժողովրդական շարժման մասնակիցները Երևանի Հանրապետության հրապարակից երթ սկսեցին մայրաքաղաքի տարբեր փողոցներով։
Շարժումը համակարգող, ազգային կոմիտեի անդամ Անդրանիկ Թևանյանը կոչ արեց քաղաքացիներին բաժանվել խմբերի և երթով շարժվել Աբովյան, Նալբանդյան, Ամիրյան, Վազգեն Սարգսյան փողոցներով` դեպի Երևանի քաղաքապետարան, և Տիգրան Մեծի պողոտայով` դեպի «Մոսկվա» կինոթատրոն:
Մինչ այդ Անդրանիկ Թևանյանն իր ելույթում հայտարարեց հաջորդ երկու օրերին` սեպտեմբերի 23–ին և 24–ին նախատեսված ակցիաների, երթերի և հանրահավաքի ժամանակացույցը։ Նա ընդգծեց, որ շարժումն ակտիվացնելու է ապակենտրոն գործողությունները:
Թեևանը կոչ արեց շաբաթ օրը` սեպտեմբերի 23–ին, երեք խմբի բաժանվել ու ապակենտրոն ակցիաներ անցկացնել։
«Ոստիկանությունը, որպեսզի կոնկրետ ժամի վրա չֆիքսվի, ցանցային պայքարի խմբերը պետք է իրականացնեն երեք տիպի գործողություն Երևանի և ՀՀ մարզերի տարբեր հատվածներում` համեմատաբար լայն զանգվածով հավաքներ, երթեր, փողոցներ փակել»,– հայտարարեց նա։
Կիրակի` սեպտեմբերի 24–ի երեկոյան, Հանրապետության հրապարակում տեղի կունենա մեծ հանրահավաք։
Թևանյանը նշեց, որ բողոքի ակցիաների շարժիչ ուժը պետք է դառնան ուսանողները։ Նա ուսանողներին կոչ արեց երկուշաբթի օրվանից` սեպտեմբերի 25–ից, ակցիաներ անցկացնել նաև իրենց ուսումնական հաստատություններում։
Հիշեցնենք՝ սեպտեմբերի 19–ին Արցախի դեմ սանձազերծված ադրբեջանական նոր ագրեսիայի ֆոնին Երևանում մասշտաբային ցույցեր են սկսվել։ Մարդիկ պատասխան են պահանջում ՀՀ իշխանություններից Արցախի հարցում դրսևորած անգործության համար։
Այսօր առավոտից Երևանի տարբեր վարչական շրջաններում քաղաքացիները անհնազանդության ակցիաներ են իրականացնում։ Կարմիր բերետավորներն Ամիրյան փողոցից, բիրտ ուժ կիրառելով, բերման ենթարկեցին ցուցարարների մի մասին։ Նրանց թվում էր նաև ՀՀ երկրորդ նախագահ Ռոբերտ Քոչարյանի որդին` Լևոն Քոչարյանը։
Լրատվամիջոցների ֆիքսած կադրերում երևում է, որ ոստիկանները Լևոն Քոչարյանին բերման ենթարկելիս մեքենայի մեջ ուժեղ հարվածներ են հասցնում նրան։
Ավելի ուշ հայտնի դարձավ, որ Լևոն Քոչարյանին տեղափոխել են «Նաիրի» ԲԿ։ Նրա մոտ ախտորոշվել է փակ գանգուղեղային վնասվածք` ուղեղի ցնցում: