ԵՐԵՎԱՆ, 21 սեպտեմբերի – Sputnik. Հնարավոր է` Ուկրաինայի ԶՈւ գլխավոր հրամանատար Վալերի Զալուժնիին մեղադրանք առաջադրվի Ուկրաինայի հարավը լքելու վերաբերյալ քրեական գործով։
ԶԼՄ–ների տվյալներով` քննությունը 1.5 տարի է, ինչ ընթանում է, գլխավոր հրամանատարն արդեն զրուցել է քննիչների հետ։ Զալուժնին գործով դատավարական կարգավիճակ դեռ չունի, սակայն Բի–բի–սին չի բացառում, որ կարող է ստանալ։ Ինչպես հայտնում են ԶԼՄ–ները, քաղաքական շրջանակներում այդ գործն արդեն «Զալուժնիի գործ» են անվանում։ Միևնույն ժամանակ Ուկրաինայի անվտանգության ծառայությունն ու հետաքննությունների պետական բյուրոն հրաժարվել են պատասխանել պարբերականի հարցմանը` կապված քննչական գործողություններում Զալուժնիի մասնակցության հետ։
Դեռ որևէ մեկին մեղադրանք չի առաջադրվել, սակայն Բի–բի–սին ենթադրում է, որ դա շատ շուտով կարող է տեղի ունենալ։ Դեռ հարցաքննություններ են անցկացնում, այդ թվում հարցաքննվում են ռազմական հրամանատարության և քաղաքացիական իշխանությունների ներկայացուցիչներ։ Մասնավորապես քննիչները հարցաքննել են պաշտպանության ուժերի հրամանատար Սերգեյ Նաևին, «Յուգ» զորամիավորման նախկին հրամանատարներ Անդրեյ Կովալչուկին և Անդրեյ Սոկոլովին, մինչև 2022 թվականի հուլիս Խերսոնի մարզի ուկրաինական վարչակազմի ղեկավար Գենադի Լագուտային, որին հետագայում մահացած են գտել Կիևում։
Ուկրաինայի նախագահի գրասենյակում Բի–բի–սիի աղբյուրը հայտնել է, որ ուկրաինացի զինվորականները պետք է կամուրջներ պայթեցնեին և այլ միջոցներ կիրառեին կանոնադրության համաձայն` առանց նախագահ Զելենսկու հրահանգի։
Ավելի վաղ արևմտյան ԶԼՄ–ները հայտնել էին Ուկրաինայի ԶՈւ մարտական գործողությունների մարտավարության հարցում Զալուժնիի և Զելենսկու տարաձայնությունների մասին։ Մարտին «Bild» թերթը, հղում անելով աղբյուրներին, տեղեկացրել էր, որ Արտյոմովսկի շուրջ ստեղծված իրավիճակը վեճ է առաջացրել նախագահի և գլխավոր հրամանատարի միջև։ Օգոստոսին Զելենսկին հայտարարել էր, որ չի նախատեսում Զալուժնիին ազատել զբաղեցրած պաշտոնից։