ԵՐԵՎԱՆ, 20 սեպտեմբերի – Sputnik. Շուրջ 3 տասնյակ քաղաքական ուժեր մասնակցել են խորհրդակցությանը, որի ժամանակ քննարկվել է իշխանափոխության, ինչպես նաև ստեղծված ծանր վիճակից Հայաստանն ու Արցախը դուրս բերելու հարցերը։
Նշենք, որ խորհրդակցությանը մասնակցելու հրավերի մասին հայտարարվել էր սեպտեմբերի 19-ին կառավարության շենքի մոտ կազմակերպված բողոքի ակցիայի ժամանակ։
Սաղաթելյանը շեշտեց, որ փոխըմբռնում եղել է առնվազն երկու հարցերի շուրջ, որոնցից մեկը վերաբերում է համակարգող մարմնի ստեղծմանը։
«Նախ պետք է ստեղծվի համակարգող, ազգային խումբ, կոմիտե, նման մի ֆորմատ, որը կհամակարգի բոլոր աշխատանքները»,– նշեց Սաղաթելյան։
Անդրադառնալով այն հարցին` իշխանափոխության դեպքում Փաշինյանին հեռանալու ժամանակ տալո՞ւ են, Սաղաթելյանը նշեց, որ այդ մասին խոսելու ժամանակը չէ։
Հիշեցնենք` Ադրբեջանը սեպտեմբերի 19–ին լայնամասշտաբ հարձակում է սկսել Արցախի դեմ։ Արցախի ՊՆ–ի հաղորդագրության համաձայն` ժամը 13։00–ի սահմաններում ադրբեջանական զինուժը շփման գծի ողջ երկայնքով խախտել է հրադադարը` հասցնելով հրթիռահրետանային հարվածներ։
Ադրբեջանի պաշտպանության նախարարությունը հայտարարել է, թե լոկալ բնույթի հակաահաբեկչական միջոցառումներ է անցկացնում։
Արցախի դեմ սանձազերծված ադրբեջանական նոր ագրեսիան ՀՀ քաղաքացիներին բերել էր ՀՀ կառավարության շենքի մոտ։ Նրանք պատասխան էին պահանջում ՀՀ իշխանություններից։
Բողոքի ակցիաների ժամանակ քաղաքացիների ու ոստիկանական ուժերի միջև բախումների հետևանքով եղան տուժածներ ու բերման ենթարկվածներ։
Հավելենք, որ Ադրբեջանի կողմից իրականացված լայնածավալ ահաբեկչական հարձակման հետևանքով այս պահի դրությամբ Արցախում 32 զոհ կա, ավելի քան 200 վիրավոր։