Արցախի դեմ սանձազերծված ադրբեջանական նոր ագրեսիան հարյուրավոր քաղաքացիների բերել է ՀՀ կառավարության շենքի մոտ, որոնք ի նշան բողոքի փակեցին Տիգրան Մեծի պողոտայից դեպի Հանրապետության հրապարակ տոնող ճանապարհը։
Նրանք եկել են ՀՀ իշխանություններից պատասխաններ պահանջելու։
«Բոլորդ միացրեք ձեր հեռախոսներն ու ուղիղ եթեր մտեք, ոնց անում էին 2018 թվականի հեղափոխությանը։ «Ֆեյսբուքում» ժամանակ անցկացնողները պետք է տեսնեն, թե ինչի է հանգեցրել իրենց լռությունը»,–ասաց երիտասարդ ակտիվիստներից մեկը։
Նշենք, որ բողոքի ակցիան կազմակերպելու որոշումն ինքնաբուխ է։ ՀՀ կառավարության շենքի մոտ են գալիս այն քաղաքացիները, որոնց մտահոգում է Արցախի և Հայաստանի ճակատագիրը։
Հիշեցնենք` Ադրբեջանն այսօր լայնամասշտաբ հարձակում է սկսել Արցախի դեմ։ Արցախի ՊՆ–ի հաղորդագրության համաձայն` ժամը 13։00–ի սահմաններում ադրբեջանական զինուժը շփման գծի ողջ երկայնքով խախտել է հրադադարը` հասցնելով հրթիռահրետանային հարվածներ։
Ադրբեջանի պաշտպանության նախարարությունը հայտարարել է, թե լոկալ բնույթի հակաահաբեկչական միջոցառումներ է անցկացնում։
Ադրբեջանական ռազմական գերատեսչությունը պնդում է, որ իրենք գերճշգրիտ զենքերով հարվածներ են հասցնում առաջնագծում և խորքում՝ ավերելով հայկական զինված ուժերի կազմավորումների դիրքերը, կրակակետերը, ինչպես նաև մարտական միջոցներն ու ռազմական օբյեկտները։
Նշվում է, որ իբր քաղաքացիական բնակչությունը և քաղաքացիական ենթակառուցվածքները չեն թիրախավորվում։
Արցախի մարդու իրավունքների պաշտպան Գեղամ Ստեփանյանը հայտնել է, որ Ադրբեջանի հարձակումների հետևանքով խաղաղ բնակչության շրջանում առնվազն 2 զոհ կա, այդ թվում՝ մեկ երեխա, ևս 11-ը վնասվածքներ են ստացել, վիրավորներից 8–ը երեխաներ են։