Այսօր Արցախում ադրբեջանական ռմբակոծության տակ երեխաներ են լույս աշխարհ եկել։ Արցախի տեղեկատվական շտաբը տեսանյութ է հրապարակել։ Դրանում երևում են ծննդկան կանայք` նորածին երեխաներին գրկներին, միջանցքներում նստած։
Լրագրողի հետ զրույցում ծննդատան մանկաբարձ–բժշկուհին պատմում է, որ երբ ռմբակոծությունը սկսվեց, անմիջապես նկուղ են տեղափոխվել, և հենց այնտեղ էլ տղա երեխայի ծնունդ ընդունել։ Որոշ ժամանակ անց ստիպված են եղել նկուղից վիրահատարան բարձրանալ` կեսարյան հատում իրականացնելու համար։ Թեպետ իրավիճակը լարված էր, քաղաքն անընդհատ ռմբակոծվում էր, բայց անհրաժեշտ էր մայրիկի ու երեխայի կյանքերը փրկել։ Բարեբախտաբար, կեսարյան հատմամբ ծնունդը ևս հաջող է անցել։
Հիշեցնենք` Ադրբեջանն այսօր լայնամասշտաբ հարձակում է սկսել Արցախի դեմ։ Արցախի ՊՆ–ի հաղորդագրության համաձայն` ժամը 13։00–ի սահմաններում ադրբեջանական զինուժը շփման գծի ողջ երկայնքով խախտել է հրադադարը` հասցնելով հրթիռահրետանային հարվածներ։
Ադրբեջանի պաշտպանության նախարարությունը հայտարարել է, թե լոկալ բնույթի հակաահաբեկչական միջոցառումներ է անցկացնում։
Ժամը 20:00-ի դրությամբ Ադրբեջանի կողմից իրականացված լայնածավալ ահաբեկչական հարձակման հետևանքով կա 25 զոհ, այդ թվում՝ 2 խաղաղ բնակիչ, հայտնի էր 140 վիրավորի մասին։