ԵՐԵՎԱՆ, 13 սեպտեմբերի–Sputnik. Եթե պարզվի` ՀՀ որևէ մակարդակի որևէ պաշտոնյա վարչական լծակի օգտագործմամբ ինչ–որ մեկին տանում է հանրահավաքի, ընտրության, ապա նա կազատվի աշխատանքից։ Այսօր Ազգային ժողովում կառավարության հետ հարցուպատասխանի ժամանակ հայտարարեց ՀՀ վարչապետ Նիկոլ Փաշինյանը` պատասխանելով ԱԺ «Հայաստան» խմբակցության պատգամավոր Գեղամ Նազարյանի հարցին։
«Ներում–բեկում չի լինելու։ Ուզում է` իշխանության հանրահավաքին տանի, ուզում է` ընդդիմության, որտեղ ուզում է` տանի, էդ մարդն ազատվելու է աշխատանքից։ Եթե պարզվի, որ այդ մարդն ինձ ամենամոտն է, ուրեմն` նախ կդադարի լինել ինձ հարազատ, երկրորդ` կազատվի աշխատանքից»,– ասաց վարչապետ Փաշինյանը։
Նա առաջարկեց իրեն փոխանցել ցուցակներն ու հիմնավորումները` խոստանալով հաջորդ հարցուպատասխանի ժամանակ անդրադառնալ արդյունքներին։
Նշենք, որ օրերս սոցցանցերում տեսանյութ էր տարածվել, որտեղ մի տղամարդ հարցնում և ցուցակագրում էր Տիգրան Ավինյանի նախընտրական հավաքներին մասնակցող մանկապարտեզների, դպրոցների և այլ պետական հաստատությունների աշխատակիցներին։