ՀՀ ԱԳ նախարարն ԱՄՆ պետքարտուղարի օգնականի հետ խոսել է Լաչինի միջանցքի մասին

ԵՐԵՎԱՆ, 8 սեպտեմբերի – Sputnik. ՀՀ արտաքին գործերի նախարար Արարատ Միրզոյանը Լաչինի միջանցքի հարցը քննարկել է ԱՄՆ պետքարտուղարի օգնականի պաշտոնակատար Յուրի Քիմի հետ հեռախոսազրույցի ընթացքում։ Տեղեկությունը նշված է նախարարի X- ի (նախկինում՝ Twitter) միկրոբլոգում։

Հեռախոսազրույցի ժամանակ ՀՀ արտաքին քաղաքական գերատեսչության ղեկավարն ընդգծել է Ադրբեջանի շարունակական ագրեսիվ քաղաքականությունը զսպելու անհրաժեշտությունը։

Ավելի ուշ Յուրի Քիմը ևս գրառում արեց X–ի իր էջում` նշելով, որ ՀՀ արտաքին գործերի նախարար Արարատ Միրզոյանի հետ հեռախոսազրույցում մտահոգություն է հայտնել Լեռնային Ղարաբաղի հումանիտար իրավիճակի վերաբերյալ։

Ապա ԱՄՆ պետքարտուղարի օգնականի ժամանակավոր պաշտոնակատարը ևս մեկ գրառում արեց այն մասին, որ կառուցողական զրույց է ունեցել Ադրբեջանի ԱԳ նախարար Ջեյհուն Բայրամովի հետ Լեռնային Ղարաբաղ մարդասիրական բեռներ հասցնելու համար Լաչինի և այլ երթուղիների անհապաղ ու միաժամանակյա բացման վերաբերյալ:

«Երթուղիների բացումն ու ուղիղ բանակցությունները չկարգավորված հարցերի լուծման բանալին են»,– գրել է Քիմը։

Նա նաև ողջունել է արցախցի երեք ուսանողների ազատ արձակումը:

Հիշեցնենք` 2022–ի դեկտեմբերի 12-ին քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակեցին Արցախը ՀՀ–ին կապող Ստեփանակերտ-Գորիս մայրուղին, որտեղից հեռացան ապրիլի 28-ին, քանի որ ապրիլի 23-ին Ադրբեջանն անցակետ տեղադրեց Լաչինի ճանապարհի վրա` այն ամբողջությամբ առնելով իր վերահսկողության տակ։ Արցախը զրկվել է նաև ՀՀ–ից մատակարարվող գազից և էլեկտրաէներգիայից։

Հուլիսի 26-ին առաջին անհրաժեշտության շուրջ 400 տ ապրանքով բեռնված 19 բեռնատար Երևանից ուղևորվեցինշրջափակման մեջ գտնվող Արցախ։ Բեռնատարները հասել են Սյունիքի Կոռնիձոր համայնք և մինչ օրս կանգնած են Լաչինի միջանցքի սահմանին։

Օգոստոսի 30–ից սահմանին կանգնած են մնացել նաև Ֆրանսիայի տարբեր քաղաքներից Արցախի համար բեռ տանող ֆրանսիական բեռնատարները։