ԵՐԵՎԱՆ, 31 օգոստոսի – Sputnik. ԱՄՆ-ում կարծում են, որ Բաքվի և Ստեփանակերտի ներկայացուցիչները պետք է անհապաղ հանդիպեն և պայմանավորվեն Լեռնային Ղարաբաղի բնակիչներին մարդասիրական օգնություն տրամադրելու հարցի շուրջ։ Այս մասին հայտարարել է ԱՄՆ Պետական դեպարտամենտի մամուլի ծառայության ղեկավար Մեթյու Միլլերը, հայտնում է ՏԱՍՍ–ը։
«Մենք խորապես մտահոգված ենք Լեռնային Ղարաբաղում հումանիտար իրավիճակի վատթարացմամբ, որը պայմանավորված է արժանապատիվ կենսամակարդակի ապահովման համար անհրաժեշտ սննդի, դեղորայքի և այլ ապրանքների մատակարարման շարունակական արգելափակմամբ», - նշել է դիվանագետը։
Նա կրկին կոչ է արել անհապաղ բացել Լաչինի միջանցքը մարդասիրական, կոմերցիոն բեռների և ուղևորափոխադրումների համար:
«Բաքվի պաշտոնյաները և Ստեփանակերտի ներկայացուցիչները պետք է անհապաղ հանդիպեն՝ համաձայնեցնելու Լեռնային Ղարաբաղում ապրող տղամարդկանց, կանանց և երեխաներին կենսական պաշարներ մատակարարելու ուղիները, ներառյալ մատակարարումների լրացուցիչ երթուղիները, և վերսկսեն բոլոր չլուծված հարցերի քննարկումը», - հավելել է Միլլերը։
Նրա խոսքով՝ վերջին շաբաթների ընթացքում Միացյալ Նահանգները շարունակաբար համագործակցել է կողմերի հետ, որպեսզի թույլ տան, որ մարդասիրական օգնությունը հասնի Լեռնային Ղարաբաղի բնակչությանը:
«Հիմնական մարդասիրական օգնությունը երբեք չպետք է դառնա քաղաքական տարաձայնությունների պատանդ», - եզրափակել է նա։
Հիշեցնենք` 2022–ի դեկտեմբերի 12-ին քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակեցին Արցախը ՀՀ–ին կապող Ստեփանակերտ-Գորիս մայրուղին, որտեղից հեռացան ապրիլի 28-ին, քանի որ ապրիլի 23-ին Ադրբեջանն անցակետ տեղադրեց Լաչինի ճանապարհի վրա` այն ամբողջությամբ առնելով իր վերահսկողության տակ։ Արցախը զրկվել է նաև ՀՀ–ից մատակարարվող գազից և էլեկտրաէներգիայից։
Հուլիսի 26-ին առաջին անհրաժեշտության շուրջ 400 տ ապրանքով բեռնված 19 բեռնատար Երևանից ուղևորվեցինշրջափակման մեջ գտնվող Արցախ։ Բեռնատարները հասել են Սյունիքի Կոռնիձոր համայնք և մինչ օրս կանգնած են Լաչինի միջանցքի սահմանին։
Օգոստոսի 30–ից սահմանին կանգնած են մնացել նաև Ֆրանսիայի տարբեր քաղաքներից Արցախի համար բեռ տանող ֆրանսիական բեռնատարները։