ԵՐԵՎԱՆ, 28 օգոստոսի – Sputnik. Երևանում Ռուսաստանի դեսպանատան առջև մի խումբ երիտասարդներ բողոքի ակցիա են իրականացնում։ Պատճառն այսօր Լաչինի միջանցքում տեղադրված անօրինական անցակետից մարդկանց առևանգումն է։
Այսօր հաղորդվեց, որ ադրբեջանցիներն անցակետից արցախցի երիտասարդի են առևանգել, որը ռուս խաղաղապահների ուղեկցությամբ Հայաստան էր գալիս սովորելու նպատակով։ Ավելի ուշ հայտնի դարձավ, որ ևս երկու երիտասարդներ չեն հատել անցակետը, նրանց հետ կապ հաստատել չի հաջողվում։ Ադրբեջանական կողմն էլ տեղեկատվություն տարածեց, թե 3 երիտասարդներ «ձերբակալվել են նախկինում Ադրբեջանի դրոշը անարգելու համար»։ Ադրբեջանի գլխավոր դատախազը նրանց մեղադրանք է առաջադրել 2 հոդվածներով։
«Ժողովո՛ւրդ, խնդրում եմ, որ անտարբեր չլինեք և 1915 թվականի տրամաբանությամբ չմտածեք։ Թուրքը մի օր էլ Երևան է մտնելու, եթե այսպես շարունակեք»,– բարձրախոսով կոչ է անում ակցիայի մասնակից երիտասարդներից մեկը` կոչ անելով անցորդներին միանալ ակցիային։
Ի նշան բողոքի երիտասարդները փակել են Սուրբ Գրիգոր Լուսավորիչ փողոցի` ՌԴ դեսպանատան հարակից մասը։
Բողոքի ակցիա Երևանում ՌԴ դեսպանատան մոտ
© Sputnik / Artak Aghababyan
Հիշեցնենք, որ հուլիսի 29–ին էլ կրկին Լաչինի միջանցքից Ադրբեջանի սահմանապահ ծառայության ներկայացուցիչները առևանգել էին ԿԽՄԿ միջնորդությամբ և ուղեկցությամբ ՀՀ տեղափոխվող անհետաձգելի բուժօգնության կարիք ունեցող Վագիֆ Խաչատրյանին։
Ադրբեջանում նրան կալանավորել են։ Վագիֆ Խաչատրյանը, ըստ մեղադրանքի, իբր հանցավոր խումբ է ստեղծել, որը 1991թ. դեկտեմբերի 21-ին մասնակցել է Խոջալուի շրջանի Մեշալի գյուղի բնակիչների դեմ հանցագործություններին։