ԵՐԵՎԱՆ, 28 օգոստոսի – Sputnik. Նիգերի մայրաքաղաք Նիամեյում Ֆրանսիայի դեսպանատան էլեկտրաէներգիայի և ջրի մատակարարումը չի դադարեցվել։ Այս մասին հայտնում է ՌԻԱ Նովոստին` հղում անելով ֆրանսիական TF1 հեռուստաալիքին։
Նիգերի ԱԳՆ–ն օգոստոսի 25–ին որոշեց զրկել Ֆրանսիայի դեսպանին ընդունելությունից և խնդրեց նրան 48 ժամվա ընթացքում լքել երկիրը։ Միևնույն ժամանակ Փարիզում հայտարարեցին, որ խնդրանքը հաշվի են առել` նշելով, որ ապստամբներն իրավասու չեն նման բան խնդրել։ Այսօր մի շարք ԶԼՄ–ներ, հղում անելով սոցցանցերին, հայտնեցին, որ Նիգերի նոր իշխանությունն անջատել է դիվանագիտական ներկայացուցչության կենսապահովման համակարգերը։
Ինչպես հեռուստաալիքին հայտնել է դիվանագիտական աղբյուրը, Նիամեում Ֆրանսիայի դեսպանատանը շարունակվում է ջրի և հոսանքի մատակարարումը։ Աղբյուրը հավելել է, որ անկախ հանգստյան օրերին մայրաքաղաքցում անցկացված ցույցերից, դեսպանատունը հարձակումների չի ենթարկվել և ներկա պահին շարունակում է աշխատել։
TF1 հեռուստաալիքի ռեպորտաժի հեղինակները ենթադրում են, որ դեսպանատան կոմունալ շրջափակման մասին բամբասանքները առաջացել են պաշտոնական հաղորդագրությունից հետո, որը տարածել էին Հայրենիքի պաշտպանության ազգային խորհրդի (CNSP) աջակցման կոմիտեի ակտիվիստները։ Հայտարարության մեջ մասնավորապես ասվում էր, որ այն մատակարարները, որոնք կշարունակեն ֆրանսիական կողմին ապահովել ապրանքներով և ծառայություններով, համարվելու են «ինքնիշխան ժողովրդի թշնամիներ»։
Նիգերի զինվորականները հուլիսի վերջին ազգային հեռուստատեսությամբ հայտարարել էին նախագահ Մոհամեդ Բազումին իշխանությունից հեռացնելու մասին: Արևմտյան երկրների մեծ մասի և ECOWAS-ի առաջնորդները դատապարտել են հեղաշրջումը: Օգոստոսի սկզբին ECOWAS-ի երկրները ծրագիր ընդունեցին` Նիգերում ռազմական ինտերվենցիայի դեպքում այն կիրառելու համար: