ԵՐԵՎԱՆ, օգոստոսի 27 – Sputnik. Կրասնոյարսկի երկրամասի Շարիպովո քաղաքի երեք բնակիչներին ծեծելու մեջ կասկածվող չորս անձի նկատմամբ քրեական գործ է հարուցվել, Տեղեկությունը հայտնում է ՌԻԱ Նովոստին։
Օգոստոսի 26-ին իրավապահ մարմինները հաղորդագրություն են ստացել Շարիպովոյի 6-րդ միկրոշրջանի փողոցում 30-ամյա տղամարդու դիակի հայտնաբերման, ինչպես նաև տարբեր աստիճանի վնասվածքներով ամուսնական զույգի հիվանդանոց հոսպիտալացման մասին:
«Քննչական բաժնի կողմից երեք քրեական գործ է հարուցվել 4 ադրբեջանցիների նկատմամբ։ Կախված յուրաքանչյուրի դերից՝ նրանք կասկածվում են սպանության, դիտավորությամբ առողջությանը ծանր վնաս պատճառելու, խուլիգանության մեջ: Քրեական գործերը միացվել են մեկ վարույթում», - նշված է հաղորդագրության մեջ:
Նախնական վարկածով՝ շաբաթ օրը առավոտյան ժամը 5-ի սահմաններում քաղաքի 6-րդ միկրոշրջանի փողոցում օտար պետության երեք քաղաքացիների ու տեղի երեք բնակիչների միջև լեզվակռիվ է սկսվել:
«Կասկածյալները, գտնվելով ալկոհոլի ազդեցության տակ, ոտնձգություններ են կատարել անցնող աղջկա նկատմամբ, իսկ ամուսնական զույգն ու նրանց ծանոթը պաշտպանել են նրան։ Այնուհետև օտարերկրացիները զանգահարել են իրենց ընկերոջը, որն ամրաններ և երկու շինարարական մուրճ է բերել: Արդյունքում կոնֆլիկտը վերածվել է ծեծկռտուքի։ Չորս կասկածյալները հարձակվել են տուժողների վրա և ամրանով ու մուրճերով բազմաթիվ հարվածներ են հասցրել նրանց մարմնի տարբեր մասերին: Կասկածյալներից մեկն իր մոտի դանակով հարվածներ է հասցրել», - հայտնում է հետաքննությունը։
Ստացած դանակի հարվածների հետևանքով 30-ամյա տղամարդը տեղում մահացել է, 27-ամյա տուժածը և նրա 25-ամյա կինը տարբեր աստիճանի վնասվածքներով տեղափոխվել են հիվանդանոց: Նրանց ցուցաբերվում է անհրաժեշտ բժշկական օգնություն։
Ներկայումս կասկածյալները ձերբակալված են: