ԵՐԵՎԱՆ, 19 օգոստոսի – Sputnik. Նիգերի տարածքում՝ Բուրկինա Ֆասոյի սահմանի մոտ տեղի ունեցած բախումը, որի հետևանքով 17 զինծառայող է զոհվել, ահաբեկչական հարձակում է: Տեղեկությունը ՌԻԱ Նովոստիին տված հարցազրույցում հայտնել է Բուրկինա Ֆասոյի պաշտպանության և վետերանների գործերի նախարար Կասում Կուլիբալին:
«Նիգերի բարձրագույն ղեկավարությունը զբաղվում է ահաբեկչության դեմ պայքարի հարցով։ Նման դեպքերը խոսում են ահաբեկչական խմբերի ազդեցության մասին, նրանք հարձակվում են պաշտպանության ուժերի, գյուղերի բնակիչների վրա», - ասել է Կուլիբալին։
Նա ավելացրել է, որ Բուրկինա Ֆասոյում սովոր են նման բախումներին, որոնք հաճախ տեղի են ունենում երկրի պաշտպանական ուժերի և ահաբեկիչների միջև:
«Իսկ մենք միշտ փորձում ենք արձագանքել մեր հնարավորությունների սահմաններում։ Նրանք հաճախ լինում են այն վայրերում, որտեղ մենք չենք սպասում, կամ որտեղ մենք քիչ ենք, բայց փորձում ենք պայքարել: Տա Աստված, որ մենք անհրաժեշտ միջոցներ ունենանք այդ ահաբեկիչներին հաղթելու համար», - ընդգծել է նախարարը։
Նրա կարծիքով, եթե Նիգերը քաոսի մեջ ընկնի, տարածաշրջանում բարենպաստ պայմաններ կառաջանան ահաբեկչական խմբավորումների համար:
Նա հարևան Նիգերում ահաբեկչական ակտիվության աճի ռիսկը համեմատել է Իրաքի, Սիրիայի և Լիբիայի շուրջ ստեղծված իրավիճակի հետ:
Նիգերի զինվորականները հուլիսի վերջին ազգային հեռուստատեսությամբ հայտարարել էին նախագահ Մոհամեդ Բազումին իշխանությունից հեռացնելու մասին: Արևմտյան երկրների մեծ մասի և ECOWAS-ի առաջնորդները դատապարտել են հեղաշրջումը: Օգոստոսի սկզբին ECOWAS-ի երկրները ծրագիր ընդունեցին Նիգերում ռազմական ինտերվենցիայի դեպքում կիրառելու համար: