Չմոռանանք պատմությունը. Սելեզնյովը` Օշականի մարտում հայ և ռուս զինվորների սխրանքների մասին

ԵՐԵՎԱՆ, 17 օգոստոսի – Sputnik. Հայաստանի և Ռուսաստանի ներկայացուցիչները Օշականի ճակատամարտի 196-րդ տարելիցի կապակցությամբ հարգանքի տուրք են մատուցել մարտի հերոսների հիշատակին։ Հայաստանում ՌԴ դեսպանատունը, Երևանում Ռուսական տան և Արմավիրի մարզպետարանի անձնակազմի հետ հանդիսավոր միջոցառում է անցկացրել «Օշականի հերոսներին» հուշարձանի մոտ։

Հայաստանում ՌԴ դեսպանատան խորհրդական–դեսպանորդ Մաքսիմ Սելեզնյովը հիշեցրեց, որ իրենք հուշարձանի մոտ հավաքվում են ամեն տարի` հարգանքի տուրք մատուցելու ռուս զինվորների և սպաների ու հայ կամավորների հիշատակին, որոնք իրենց կյանքն են տվել հայ ժողովրդի ազատության և անկախության համար և կարողացել պահպանել երկրի սրբությունը` Մայր Աթոռ սուրբ Էջմիածինը։

«Այսօր հայտնի իրադարձությունների ֆոնին չի կարելի մոռանալ պատմության էջերը։ Կուզեի ընդգծել, որ Ռուսաստանն անկեղծորեն հավատում է Հայաստանի հետ բարեկամությանը։ Մեր ժողովուրդներին բազմադարյա մշակութաքաղաքակրթական կապեր են կապում, ինչպես նաև հոգևոր մտերմություն։ 1827 թվականի օգոստոսի 17-ը մեկընդմիշտ գրվեց մեր ժողովուրդների պատմական տարեգրության մեջ։ Հայ և ռուս զինվորները գերազանցող հակառակորդին կարողացան ապացուցել, որ միասին իրենք կարող են կանգուն մնալ և հաղթել նրան», – ասաց Սելեզնյովը։

Նշեց` հայ և ռուս զինվորներն այն ժամանակ անցյալի ամենակարևոր դասը տվեցին։ Դիվանագետը հավելեց, որ կանցնեն տարիներ և հարյուրամյակներ, բայց Օշականի ճակատամարտի հերոսների անմար փառքը կմնա երկու ժողովուրդների հիշողության մեջ և օրինակ կծառայի ապագա սերունդների համար։

ՌԴ դեսպանատան ներկայացուցչի խոսքով` XIX դարի հայ և ռուս զինվորների փորձով է պետք երիտասարդությանը սովորեցնել իսկական քաջություն և հերոսություն։

Սելեզնյովը երկու երկրներին մաղթեց հնարավորինս արագ, միասնական ուժերով դուրս գալ ծանր այն փորձություններից, որոնց բախվել է։

Հայաստանի կրթության, գիտության, մշակույթի և սպորտի նախարարության ժամանակակից արվեստի վարչության պետ Սվետլանա Սահակյանն իր հերթին ասաց, որ այսօր երկու ժողովուրդների համար ծանր ժամանակներ են, սակայն ինքը հույս ունի, որ հնարավոր կլինի հաղթահարել ամեն բան։

«Ամեն տարի մենք հիշում և հարգանքի տուրք ենք մատուցում մեր հերոսներին, որոնք կողք–կողքի կռվել և պաշտպանել են մեր երկիրը` պայմաններ ստեղծելով ապրելու և աշխատելու այս ազատ երկրում։ Մենք խոսում ենք սերունդների ժառանգորդականության մասին, երիտասարդ սերնդի հիշողության, այն մասին, թե ինչպես մեզ ծանոթացրեց ճակատագիրը, ինչպես էինք երկար ժամանակ ռուս ժողովրդի հետ արարում և մարտնչում», – ասաց Սահակյանը։

Օշականի հերոսամարտի հուշարձանի մոտ ծաղիկներ խոնարհվեցին և ծաղկեպսակներ տեղադրվեցին։

Նշենք, որ 1827 թվականի Օշականի ճակատամարտը Ռուս-պարսկական պատերազմի հերոսական էջերից է։ Այն հայ և ռուս ժողովուրդների դարավոր բարեկամության պատմության կարևոր հանգրվաններից մեկն է: Հենց այդ հաղթանակի շնորհիվ Արևելյան Հայաստանն ազատագրվեց պարսկական լծից և միացվեց Ռուսաստանին։

Օշականի հաղթանակն այս ճակատամարտում հավերժացել է 1131 զոհված ռուս զինվորի հիշատակին նվիրված հուշարձանով: 2011 թվականի ապրիլին այն վերանորոգվել ու վերաբացվել է։