Սևանա լճում այսօր ավարտվեց ծովակալ Իսակովի անվան առագաստանավային սպորտի միջազգային հուշամրցաշարը։ Օգոստոսի 12-ից անցկացվող մրցաշարի մոտ 3 տասնյակ մասնակիցներն այս անգամ երեք երկրներից էին` Հայաստանից, Ռուսաստանից և Վրաստանից։
Հուշամրցաշարի եզրափակիչի արդյունքներով` «Օպտիմիստ» դասում առաջին տեղը զբաղեցրեց Ռուսաստանի ներկայացուցիչ Օլեգ Ուշկովը, երկրորդ տեղը` Հայաստանի ներկայացուցիչ Նարե Սուքիասյանը, իսկ երրորդը` կրկին Ռուսաստանի ներկայացուցիչ Ալբինա Վալեևան։
Իսկ «Լուչ–մինի» դասում առաջին տեղը կիսեցին Ռուսաստանի ներկայացուցիչ Պոլինա Ռադկոն և Վրաստանի ներկայացուցիչ Նիկոլոզ Տատարիշվիլին, իսկ երրորդ տեղը բաժին հասավ Հայաստանի ներկայացուցիչ Միքայել Դավթյանին։
Հուշամրցաշարը դեռ խորհրդային ժամանակներից է մեր երկրում անցկացվում։ Խորհրդային Միության փլուզումից հետո հուշամրցաշարն էլ տարիներ շարունակ մոռացվեց, 2016-ին սպորտի սիրահարները վերակենդանացրին, ու այդ տարվանից այն ամենամյա է դարձել։
Առագաստանավային սպորտում կարևորը միայն ուժը չէ, այլև միտքը, մարտավարությունը, համառությունը։
Առագաստանավորդները վստահ են` եթե այս սպորտում հաջողում ես, ուրեմն կյանքում շատ բան ավելի հեշտ է դառնում, որովհետև զգայարաններդ ավելի մարզված են։ Բացատրում են` այստեղ պետք է անգամ քամին տեսնես, քանի որ քամու հետ կռիվ ես տալիս։
Մասնագետներն ու մարզիկները հույս ունեն` մեր երկրում էլ «քամու հետ կռիվ տվող» այս սպորտաձևին ավելի մեծ ուշադրություն կդարձվի, ու մենք էլ միջազգային մակարդակի մարզիկներ կունենանք։