Ոստիկանության աշխատակիցները շղթայել են Կիև–Պեչորյան մայրավանքի երեք մասնաշենքերը, որտեղ ապրում են ուխտավորներն ու վանականների մի մասը։ Տեղեկությունը հայտնում է Ուկրաինայի կանոնիկ ուղղափառ եկեղեցին (ՈւՈւԵ)։
Ուղղափառ լրագրողների միությունն ավելի վաղ հայտնել էր, որ Կիև–Պեչորյան մայրավանքի հյուրանոցային մասնաշենքում կոտրել են կողպեքները, զինված ոստիկանները ներս են մտել։
«Հենց այս պահին գրոհ է սկսվել մայրավանքի 54, 57 և 58–րդ մասնաշենքերի վրա։ Կիև–Պեչորյան մայրավանքից հայտնում են, որ ոստիկանությունը շղթայել է նշված մասնաշենքերը։ Նրանք արդեն կոտրել են կողպեքներն ու ներխուժել 57-րդ մասնաշենք։ Այդ մասնաշենքերում ոչ միայն ուխտավորներ են ապրում, այլև Կիև–Պեչորյան մայրավանքի վանականների մի մասը», – ասվում է ՈւՈւԵ–ի տելեգրամյան ալիքում։
Օգոստոսի 10-ին Կիևի դատարանը բավարարել է գույքի օգտագործման խոչընդոտները վերացնելու մասին Կիև–Պեչորյան մայրավանքի դեմ ներկայացրած հայցը։ Կիև–Պեչորյան մայրավանքի փաստաբան, կանոնիկ ՈւՈւԵ–ի ավագ քահանա Նիկիտա Չեկմանը հայտարարել է, որ Ուկրաինայի պատմության մեջ սա ամենախայտառակ դատական որոշումն է։
Վերջին մեկ տարվա ընթացքում Ուկրաինայի իշխանությունները Ուկրաինական ուղղափառ եկեղեցու նկատմամբ հալածանքների զանգվածային ալիք են բարձրացրել։ Պատճառ բերելով Ռուսաստանի հետ կապը` Ուկրաինայի տարբեր շրջաններում տեղական իշխանությունները որոշել են արգելել Ուկրաինական ուղղափառ եկեղեցու գործունեությունը, իսկ երկրի խորհրդարան օրինագիծ է ներկայացվել Ուկրաինայի ամբողջ տարածքում այն փաստացի արգելելու մասին։ Եկեղեցու որոշ հոգևորականների նկատմամբ իշխանությունները պատժամիջոցներ են սահմանել։
Ուկրաինայի անվտանգության ծառայությունը սկսել է քրեական գործեր հարուցել ՈւՈւԵ-ի հոգևորականների դեմ, «հակահետախուզական միջոցառումներ» իրականացնել, խուզարկել եպիսկոպոսներին ու քահանաներին` տաճարներում և վանքերում «հակաուկրաինական գործունեության» ապացույցներ որոնելով: