Գյումրու բժշկական կենտրոնից Երևան է տեղափոխվել ևս 3 վիրավոր

ԵՐԵՎԱՆ, 14 օգոստոսի – Sputnik. Ավտովթարի հետևանքով Գյումրու բժշկական կենտրոնից երկու տուժած տեղափոխել է Երևանի «Սուրբ Գրիգոր Լուսավորիչ» ԲԿ, ևս մեկը` «Աստղիկ» ԲԿ: Այս մասին հայտնում են ՀՀ ԱՆ լրատվական ծառայությունից։

«Սուրբ Գրիգոր Լուսավորիչ» ԲԿ տեղափոխվածները կանայք են։

ԱՆ–ից հայտնում են, որ «Սուրբ Գրիգոր Լուսավորիչ» բժշկական կենտրոնում գտնվող տուժածներից մեկն արդեն տեղափոխվել է վերակենդանացման բաժանմունք, մյուսը դեռևս հետազոտման փուլում է:

Հետազոտման փուլում է նաև «Աստղիկ» բժշկական կենտրոնում գտնվող քաղաքացին:

Ավելի վաղ հայտնել էինք, որ վթարից տուժածներից մեկը «Երևանի Մ. Հերացու անվան պետական բժշկական համալսարան» հիմնադրամում է, երկուսը` Գյումրու բժշկական կենտրոնի վերակենդանացման բաժանմունքում:

Հիշեցնենք` ողբերգական վթարը տեղի է ունեցել օգոստոսի 14-ին` ժամը 00:20-ի սահմաններում։ Լանջիկ գյուղի վարչական տարածքում
բախվել են «Volkswagen» մակնիշի ուղևորափոխադրող միկրոավտոբուսը և 33-ամյա Հ.Պ.–ի վարած «ZIL» մակնիշի բեռնատարը։ Վթարի զոհ է դարձել 11 մարդ։

Տուժածների հարազատները Sputnik Արմենիայի թղթակցի հետ զրույցում հայտնել են, որ խումբը վերադառնում էր Արևմտյան Հայաստանից, ուր մեկնել էին «Համշեն տուր» ընկերության հետ։