ԵՐԵՎԱՆ, 12 օգոստոսի – Sputnik. Ռուսաստանի զինված ուժերը մեծ հեռահարության բարձր ճշգրտության զենքով հարված է հասցրել Ուկրաինայի Իվանո-Ֆրանկովսկի մարզի Կոլոմիյա բնակավայրի շրջանում գտնվող ռազմական օդանավակայանին։ Տեղեկությունը հայտնում է ՌԴ պաշտպանության նախարարությունը։
Կուպյանսկի ուղղությամբ մեկ օրվա ընթացքում հաջողությամբ հետ են մղվել Ուկրաինայի զինված ուժերի 95-րդ դեսանտագրոհային, 14-րդ և 32-րդ մեքենայացված բրիգադների ստորաբաժանումների ութ հարձակումներ և հակագրոհներ: ՌԴ ԶՈւ զորքերի «Արևմտյան» խմբավորման գրոհային ջոկատները հարձակողական գործողությունների վարման ընթացքում բարելավել են դիրքը առաջնագծի երկայնքով։
Դոնեցկի ուղղությամբ զորքերի «Հարավային» խմբավորման ստորաբաժանումները ավիացիայի և հրետանու հետ համագործակցությամբ հետ են մղել Ուկրաինայի զինված ուժերի գրոհային խմբերի յոթ հարձակում: ԴԺՀ Պերվոմայսկոյե բնակավայրի շրջանում ոչնչացվել է Ուկրաինայի զինված ուժերի 59-րդ մեքենայացված բրիգադի զինամթերքի պահեստը։
Խերսոնի ուղղությամբ կրակային խոցման արդյունքում ոչնչացվել է ուկրաինական շուրջ 35 զինծառայող, երկու ավտոմեքենա, մեկ «Գվոզդիկա» ինքնագնաց հաուբից, ինչպես նաև ամերիկյան արտադրության AN/TPQ-36 հակահրթիռային պայքարի ռադիոտեղորոշիչ կայանը:
Բացի այդ, Զապորոժիեի մարզի Օրեխով քաղաքի շրջանում խոցվել է Ուկրաինայի ԶՈւ-ի 10-րդ բանակային կորպուսի առաջնագծի հրամանատարական կետը: Զապորոժիե քաղաքի և Զապորոժիեի մարզի Մալայա Տոկմաչկա բնակավայրի շրջաններում ոչնչացվել են հրթիռահրետանային սպառազինության և Ուկրաինայի զինված ուժերի նյութատեխնիկական ապահովման պահեստները:
Հակաօդային պաշտպանության միջոցներով մեկ օրվա ընթացքում 29 ուկրաինական ԱԹՍ է ոչնչացվել ԼԺՀ-ի Պլոշչանկա, Բելոգորովկա, ԴԺՀ-ի Պոկրովսկոյե, Զապորոժիեի մարզի Ուլյանովկա, Օչերևատոյե, Խերսոնի մարզի Պոկրովսկոյե բնակավայրերի շրջաններում, ինչպես նաև Սև ծովի ավազանի երկնքում:
Հիշեցնենք՝ 2022–ի փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողություններն ընթանում են մինչ օրս։