ԵՐԵՎԱՆ, 12 օգոստոսի – Sputnik. ԱՄՆ Հավայի նահանգում մոլեգնող բնական հրդեհների հետևանքով մահացածների թիվն ավելացել է՝ հասնելով 80-ով: Տեղեկությունը հայտնում է ՌԻԱ Նովոստին` հղում անելով Մաուի շրջանի իշխանություններին:
«Զոհերի թիվը հասել է 80-ի»,- նշվում է շրջանի վարչակազմի կայքում հրապարակված հաղորդագրությունում։
Ավելի վաղ հաղորդվել էր 67 մարդու մահվան մասին:
Մաուի և Մեծ կղզիներում անտառային հրդեհները սկսվել են չոր և շոգ եղանակի պատճառով և է՛լ ավելի են սրվում «Դորա» փոթորկի բերած ուժեղ քամու հետևանքով: Հրդեհի որոշ օջախների տարածքը հասնում է 400 հեկտարի։ Հրդեհը ոչնչացրել է մի քանի բնակավայրեր, այդ թվում՝ զբոսաշրջիկների կողմից սիրված Լահայնա քաղաքը։ Իշխանությունները ստիպված փակել են ճանապարհները, հանրային տրանսպորտը չի աշխատում։ Հարյուրավոր բնակիչներ տարհանվել են։
Նախագահ Ջո Բայդենը Հավայան կղզիներում դաշնային ենթակայության բոլոր կառույցներին, այդ թվում՝ զինվորականներին, հրահանգել է միանալ հրդեհների դեմ պայքարին: Պենտագոնում հայտարարել են, որ տեղի իշխանություններին օգնության են ուղարկվել Ազգային գվարդիայի զինվորականները, ինչպես նաև ուղղաթիռներ։