Ռուսական «Լուսին-25» ավտոմատ կայանն անջատվել է «Ֆրեգատ» արագացման բլոկից, դուրս է եկել մերձերկրային ուղեծիր և հիմա սարքը սկսել է թռչել դեպի Լուսին։ Տեղեկությունը հայտնում է «Ռոսկոսմոսը»։
«Սոյուզ 2.1բ» հրթիռը «Վոստոչնի» տիեզերակայանից արձակվել է Մոսկվայի ժամանակով 2.11-ին։ 9 րոպե անց «Ֆրեգատ» արագացման բլոկը` «Լուսին-25» կայանով, պոկվել է հրթիռի երրորդ աստիճանից և դուրս եկել մերձերկրային ուղեծիր։
Երբ արագացման բլոկն առանձնանա կայանից, երկրորդ փուլը կլինի «Լուսին-25»-ի թռիչքը դեպի Երկրի բնական արբանյակ, որը մոտ հինգ օր կտևի։
Կայանի թռիչքի հետագծի երկու շտկում է նախատեսվում. Առաջինը` մեկնարկից 1,5 օր հետո, երկրորդը` Լուսնի ուղեծիր դուրս գալուց մեկ օր առաջ:
Շարժիչային սարքավորման օգնությամբ կայանի արգելակումից կսկսվի երրորդ փուլը` թռիչք Լուսնի շուրջ 100 կիլոմետր բարձրությամբ շրջանաձև մերձբևեռային ուղեծրով, այն կտևի երեք օր: Չորրորդ փուլում «Լուսին-25»-ը կանցնի էլիպսաձև վայրէջքի ուղեծիր 18 կիլոմետր նվազագույն բարձրությամբ։
Հաշվարկները կատարելուց հետո պետք է փափուկ վայրէջք տեղի ունենա Լուսնի Հարավային բևեռի տարածքում։
«Լուսին-25»–ն առաջին կայանը կդառնա, որը փափուկ վայրէջք կկատարի Լուսնի Հարավային բևեռի տարածքում, որը տեղանքի բարդ ռելիեֆ ունի։ Նախորդ բոլոր կայանները վայրէջք են կատարել հասարակածային գոտում։ Կայանի հիմնական նպատակը լուսնային հողի կոնտակտային հետազոտությունների անցկացումն է` սառույցի առկայությունը ստուգելու նպատակով։ «Լուսին-25»-ը նաև ժամանակակից Ռուսաստանի պատմության առաջին լուսնային կայանը կդառնա։ Երկրի արբանյակ ուղարկված խորհրդային վերջին տիեզերանավը արձակվել է 1976 թվականին և կոչվել «Լուսին-24»։