Հայաստանում սոցիալապես անապահով և արտակարգ իրավիճակներից տուժած 13,000 քաղաքացու ՄԱԿ–ի պարենի համաշխարհային ծրագրի կողմից կտրամադրվեն սննդի աջակցության քարտեր։ Տեղեկացնում է ՀՀ աշխատանքի և սոցիալական հարցերի նախարարությունը։
Նախարարությունը իրազեկող տեսանյութ է հրապարակել` ներկայացնելով, թե ի՞նչ է սննդի աջակցության քարտը, ու՞մ է տրամադրվում, ինչպե՞ս պետք է օգտագործել այն, որքա՞ն գումար է տրամադրվում ընտանիքին քարտի միջոցով և որտե՞ղ կարելի է գնումներ կատարել այդ քարտով։
«Սննդի աջակցության քարտը պարենային անապահովության հաղթահարման ուղղված սոցիալական աջակցության ծառայություն է։ Քարտը թողարկվում է ընտանիքի որևէ չափահաս անդամի անունով և այդ քարտի վրա փոխանցվում է ընտանիքի բոլոր անդամների համար նախատեսված գումարը»,–նշվում է տեսանյութում։
Ծրագրի այս փուլում քարտը կտրամադրվի Շիրակի, Տավուշի, Լոռու, Կոտայքի, Վայոց Ձորի և Սյունիքի մարզերի այն աղքատ ու խոցելի ընտանիքներին, որոնք միասնական սոցիալական ծառայության կողմից կարիքների գնահատման արդյունքում ճանաչվել են պարենային անապահով։
Քարտը հնարավոր է օգտագործել միայն մթերային խանութներում սնունդ գնելու համար։
«Քարտից հնարավոր չէ գումարը կանխիկացնել, դրանով չի թույլատրվում գնել ալկոհոլ, ծխախոտ կամ կենցաղային պարագաներ»,–հավելում են նախարարությունից։
Քարտը պարունակելու է ընտանիքի յուրաքանչյուր անդամի հաշվով, յուրաքանչյուր ամսվա համար մոտ 9000 դրամ։ Օրինակ` եթե ընտանիքը ունի 5 անդամ, ապա քարտին կփոխանցվի մոտ 45 հազար դրամ։ Այդ գումարը կարելի է օգտագործել մաս–մաս կամ միանվագ։
Քարտը հնարավոր է օգտագործել ցանկացած մթերային խանութում, որտեղ կա անկախնիկ գնում կատարելու հնարավորություն։
Եվ վերջում նախարարությունը զգուշացնում է` քարտը չի կարելի փոխանցել այլ անձանց։