ԵՐԵՎԱՆ, 7 օգոստոսի – Sputnik. Կարմիր խաչն այցելել է Ադրբեջանի կողմից առևանգված Վագիֆ Խաչատրյանին։ Տեղեկությունը Sputnik Արմենիային հայտնեց Վագիֆ Խաչատրյանի դուստրը` Վերան։
«Կարմիր խաչը երեկ տեսակցել է հորս։ Մեզ ասացին, որ նա ձերբակալվածների պահման վայրում է գտնվում։ Ասացին նաև՝ դեղեր է խմում: Մեզ երկտող էլ են փոխանցել, որտեղ գրված է. «Ձեր մասին եմ մտածում, ողջություն լինի` կգամ»»,- ասաց Վերան:
Նա նշեց, որ ինքն այսօր կրկին եղել է ՄԱԿ–ի հայաստանյան գրասենյակի մոտ, որտեղ հերթական անգամ դիմել է հորը հայրենիք վերադարձնելու հարցով։ Սպասում է պատասխանի։
Հարցին` հնարավո՞ր է արդյոք, որ տեսազանգ ապահովվի հարազատների ու Վագիֆ Խաչատրյանի միջև, Վերան պատասխանեց` ասել են, թե հնարավոր ամեն բան անում են, բայց չեն խոստանում։
Հիշեցնենք` 2022–ի դեկտեմբերի 12-ին քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակեցին Արցախը Հայաստանին կապող Ստեփանակերտ-Գորիս մայրուղին, որտեղից հեռացան ապրիլի 28-ին, քանի որ ապրիլի 23-ին Ադրբեջանն անցակետ տեղադրեց Լաչինի ճանապարհի վրա` այն ամբողջությամբ առնելով իր վերահսկողության տակ։ Արցախը զրկվել է նաև Հայաստանից մատակարարվող գազից և էլեկտրաէներգիայից։
Անհետաձգելի բուժօգնության կարիք ունեցող բուժառուներն այս ընթացքում Արցախից Հայաստան են տեղափոխվում ԿԽՄԿ միջնորդությամբ և ուղեկցությամբ։ Նրանցից մեկին` Վագիֆ Խաչատրյանին, հուլիսի 29–ին առևանգել են Ադրբեջանի սահմանապահ ծառայության ներկայացուցիչները։ Ադրբեջանի գլխավոր դատախազությունը հայտարարել է, որ նա ձերբակալվել է։ Վագիֆ Խաչատրյանը, ըստ մեղադրանքի, իբր հանցավոր խումբ է ստեղծել, որը 1991թ. դեկտեմբերի 21-ին մասնակցել է Խոջալուի շրջանի Մեշալի գյուղի բնակիչների դեմ հանցագործություններին։