Ծո, ըսիգ էլիտայի համար է․ գյումրեցիները դժգոհում են՝ Համահայկական խաղերը դիտել հնարավոր չէ

ԵՐԵՎԱՆ, 5 օգոստոսի – Sputnik. Գյումրու «Շիրակ» մարզադաշտում քիչ անց կմեկնարկեն Համահայկական 8–րդ խաղերը։ 41 երկրի 179 քաղաքներից Գյումրի ժամանած ավելի քան 7 հազար մարզիկ-մարզուհիներին ուղեկցում են մեծաթիվ պատվիրակություններ։ Ձեռնարկված են անվտանգության աննախադեպ քայեր։

Գյումրեցիներից շատերը դժգոհում են․ խաղերին մարզադաշտից հետևել չի հաջողվում։

«Չկան տոմսեր ու հրավիրատոմսեր, ծո՛, ըսիգ էլիտայի համար է, էլ ընչի բերին Գյումրի հասցրին»,-դժգոհեց Կարապետը, ում չհաջողվեց մուտք գործել մարզադաշտ։

Մարզադաշտ մուտք գործելը դժվար է նաև նրանց համար, ովքեր հրավիրատոմս ունեն։

Մարզադաշտում մեծ թվով ոստիկանական ուժեր են հավաքված։

Նշենք, որ արդեն 25 տարի (Համահայկական խաղերն անցկացվում են 4 տարին մեկ) «Միասնություն սպորտով» կարգախոսը համախմբում է աշխարհասփյուռ հայերին։

Ամենամեծ թիմը Հայաստան է եկել Ռուսաստանի Դաշնությունից՝ 24 քաղաքից մոտ 800 մասնակից։