ԵՐԵՎԱՆ, 5 օգոստոսի – Sputnik. Վենեսուելայի նախագահ Նիկոլաս Մադուրոն մեղադրել է ԱՄՆ նախկին նախագահ Դոնալդ Թրամփին 5 տարի առաջ իր դեմ մահափորձ կազմակերպելու մեջ։ Նման հայտարարությամբ Մադուրոն հանդես է եկել Վենեսուելայի ազգային գվարդիայի 86-ամյակի առիթով իր ելույթի ժամանակ, նրա խոսքերը մեջբերում է ՏԱՍՍ–ը։
«Մի քանի տարի անց հայտնի է դարձել ԱՄՆ նախկին նախագահ Դոնալդ Թրամփի, Սպիտակ տան և Դոնալդ Թրամփի կառավարության անփնական և անմիջական պատասխանատվության մասին, որոնք հրամայել են Կոլումբիայի նախագահի մահափորձը նախապատրաստել», – ասել է Վենեսուելայի առաջնորդը։
Նրա խոսքով` Կոլումբիայի նախկին նախագահ Խուան Մանուել Սանթոսն իր իշխանության վերջին օրերին ֆինանսավորել է ահաբեկչական խմբի նախապատրաստումը և մահափորձից մի քանի օր առաջ հայտարարել, որ շատ շուտով Վենեսուելայում կոլապս և ռեժիմի փոփոխություն տեղի կունենա։
Մադուրոն նշել է, որ պետության ղեկավարի վրա դրոններով մահափորձը պատմության մեջ առաջինն էր։ Նա նշել է, որ սկսված հետաքննության շնորհիվ ահաբեկչություն կատարողներն անհապաղ կալանավորվել էին, նրանք ճանաչել են իրենց մեղքը և ազատազրկման դատապարտվել։ Ինչպես ասել է նախագահը, պարզվել է, որ մահափորձի հիմնական կազմակերպիչներից մեկը Կոլումբիայում թաքնվող` Վենեսուելայի խորհրդարանի նախկին պատգամավոր Խուլիո Բորխեսն էր։
Մադուրոյի դեմ պայթուցիկներով անօդաչուների կիրառմամբ մահափորձը տեղի է ունեցել 2018 թվականի օգոստոսի 4-ին Կարակասում նրա ելույթի ժամանակ։ Անօդաչուները շարքից դուրս էին բերվել, միևնույն ժամանակ ուժային կառույցների 7 աշխատակից վիրավորում էին ստացել։ Մադուրոն և երկրի նախկին ղեկավարության անդամները չեն տուժել։
Մադուրոն տեղի ունեցածի համար մեղադրել է Վենեսուելայի ծայրահեղ աջակողմյաններին ու Կոլումբիայի ծայրահեղ աջակողմյաններին, ինչպես նաև Սանթոսին, որն այն ժամանակ Կոլումբիայի ղեկավարն էր։
Վենեսուելայի առաջնորդն այն ժամանակ ենթադրել էր նաև, որ նրանցից ոմանք, ովքեր մտադիր էին իրեն սպանել, բնակվում են ԱՄՆ–ում։ Կոլումբիայի ԱԳՆ–ն Մադուրոյի մեղադրանքներն անհեթեթ է անվանել։ Վենեսուելայի ընդդիմությունը անպատասխանատու է որակել տեղի ունեցածի համար իրեն մեղադրելու փորձերը։