ԵՐԵՎԱՆ, 4 օգոստոսի – Sputnik. ԱՄՆ Պետդեպը օգոստոսի 3–ին հաստատել է, որ Վաշինգտոնն ու Կիևը սկսել են Ուկրաինայի համար անվտանգության երաշխիքների հարցեր քննարկել։ Այս մասին ասվում է ԱՄՆ արտաքին քաղաքական գերատեսչության հայտարարության մեջ, որը մեջբերում է ՏԱՍՍ–ը։
«Այսօր Պետդեպի, ԱՄՆ պաշտպանության նախարարության և Ազգային անվտանգության խորհրդի (Սպիտակ տան) ներկայացուցիչները հանդիպել են ուկրաինացի գործընկերներին` սկսելու համար անվտանգության երկարաժամկետ երաշխիքներին առնչվող երկկողմ բանակցությունները», – ասվում է ԱՄՆ արտաքին քաղաքական գերատեսչության հայտարարության մեջ։
Պետդեպի հայտարարության մեջ ասվում է, որ ԱՄՆ ուշադրության կենտրոնում են լինելու Ուկրաինային այնպիսի ուժերով ապահովելը, որոնք կարող են պաշտպանել նրան այսօր և ապագայում, ռազմական ինստիտուտների և Ուկրաինայի արդյունաբերության ոլորտներում արդյունավետության և թափանցիկության բարձրացումն ու աջակցությունը, ինչպես նաև աջակցելն այնպիսի բարեփոխումների անցկացմանը, որոնք նպաստում են Կիևի` եվրաատլանտյան ձգտումներին հասնելուն։
Ավելի վաղ այն մասին, որ Ուկրաինան և ԱՄՆ–ն սկսել են Կիևին անվտանգության երաշխիքներ տրամադրելու վերաբերյալ բանակցությունները, հայտնել էր Ուկրաինայի նախագահի գրասենյակի ղեկավար Անդրեյ Երմակը։