ԵՐԵՎԱՆ, 3 օգոստոսի – Sputnik, Նարինե Իրիցյան. ՀՀ քաղծառայության համակարգը հիերարխիկ մոդելից անցում է կատարում ժամանակակից առաջնորդության մոդելի` թիմային աշխատանքին։ Sputnik Արմենիայի հետ զրույցում ասաց «Նորք» տեղեկատվական տեխնոլոգիաների կենտրոնի գործադիր տնօրեն Անահիտ Պարզյանը։
Կենտրոնի` արհեստական բանականությամբ մշակված մոդելներից թիմային աշխատանքն է ընտրվել որպես լավագույն տարբերակ քաղծառայողների համար, որպեսզի նրանք կարողանան բարձրացնել արդյունավետությունը և ավելի դրական դինամիկա ապահովել իրենց աշխատանքի մեջ։
«Դա ժամանակակից թվային, դինամիկ աշխարհի պահանջն է, որի միջով պետք է անցնեն և՛ մասնավոր, և՛ պետական հատվածները։ Ուրախ եմ, որ պետական համակարգի աշխատակիցների վերապատրաստումն ինստիտուցիոնալ բնույթ է կրում, և տվյալ դեպքում «Նորքը» համագործակցում է քաղծառայության ինստիտուտի հետ»,– նշեց Պարզյանը։
Ներկայումս կենտրոնում վերապատրաստվում է շուրջ 300 քաղծառայող, նրանցից 60-ն արդեն ավարտել է դասընթացը։ Յուրաքանչյուր դասընթաց տևում է մի քանի օր, որոնց ընթացքում քաղծառայողները հասցնում են ծանոթանալ իրենց համակարգին վերաբերող թվային տեխնոլոգիաներին, դրանց տրամաբանությանը, սովորել հանրային խոսքի, բանակցային գործընթացի,կառավարման նրբությունները։
Արդյոք պետական հատվածի աշխատակիցների գիտելիքներն ու հատկապես թվային տեխնոլոգիաների առումով տեղեկացվածության աստիճանը գոհացուցի՞չ են։ Հարցին Անահիտ Պարզյանը փորձեց ընդհանուր գնահատական տալ` ասելով, որ գոհ է արձանագրված արդյունքներից և վստահ է, որ դասընթացները որակապես կազդեն պետական համակարգի վրա։
«Կրթությունը վերափոխման մեծ փուլի մեջ է. չկա մեկը, որ ասի` ինքն ավարտել է բուհը, ու դա բավարար է։ Հենց ավարտեցիք կրթական մի հաստատությունը, դուք պետք է սկսեք վերապատրաստվել։ Դա վերաբերում է նաև կառավարման համակարգին` ինչպես կառավարել պրոցեսները, աշխատակազմը, ինչպես ընտրել աշխատակիցների։ Խոսքը նաև բանակցային փուլերի մասին է` ինչպես, օրինակ, համագործակցել գործընկերների հետ»,– ընդգծեց նա։
Նշենք, որ «Նորք տեխնոլոգիաների կենտրոնը» ՀՀ-ում առաջատար տեխնոլոգիական կենտրոն է, որն իրականացնում է պետական և մասնավոր ոլորտի տեղեկատվական և հեռահաղորդակցության տեխնոլոգիաների ենթակառուցվածքների ներդրում և սպասարկում:
Հավելենք, որ ՀՀ 57 պետական մարմիններում ընդհանուր առմամբ աշխատում է մոտ 8000 քաղաքացիական ծառայող։