ԵՐԵՎԱՆ, 31 հուլիսի – Sputnik. Օգոստոսի 15-ից Երևանում այլևս «Գազել» մակնիշի միկրոավտոբուս երթուղի դուրս չի գա։ Այսօր Երևանի քաղաքապետարանի գործակարգավարական նիստի ժամանակ այսպիսի հայտարարություն արեց Երևանի քաղաքապետարանի տրանսպորտի վարչության պետի ժամանակավոր պաշտոնակատար Վազգեն Հարությունյանը։
«Երևան քաղաքի հասարակական տրանսպորտի բարեփոխումների շրջանակներում միկրոավտոբուսների հնամաշ շարժակազմի աշխատանքները մտնում են ավարտական փուլ»,– ասաց նա։
Նա տեղեկացրեց, որ նշված ժամկետից սկսված` Երևան քաղաքի հասարակական տրանսպորտի սպասարկումը ամբողջությամբ կիրականացվի փոքր և միջին դասի հարմարավետ ավտոբուսներով։
«Շատ ուրախալի է, որ օգոստոսի 15-ից վերջապես ազատվելու ենք այսպես կոչված հուսահատության գազելներից»,– արձագանքեց փոխքաղաքապետ Տիգրան Ավինյանը։
Նա հավաստիացրեց, որ սա դեռ բարեփոխումների ճանապարհի սկիզբն է, հաջորդ քայլը լինելու է միասնական տոմսային համակարգի ամբողջական ներդրումն ու ավտոբուսների առանձնացված գծերը։
Ի դեպ, օգոստոսի 1-ից Երևանում կգործարկվի ավտոբուսային երթուղիների հերթական խմբաքանակը: