ԵՐԵՎԱՆ, 31 հուլիսի – Sputnik. ԱՄՆ–ն շարունակում է հավատալ, որ Հայաստանի և Ադրբեջանի միջև խաղաղության պայմանագիրը հնարավոր է։ Այսօր ճեպազրույցի ժամանակ այս հայտարարությունն է արել Պետդեպարտամենտի պաշտոնական ներկայացուցիչ Մեթյու Միլլերը։
Նրա խոսքով` դա է պատճառը, որ ԱՄՆ–ն շարունակում է խոսել խաղաղության պայմանագրի մասին։
«Երկու կողմերն էլ պետք է դժվարին փոխզիջումների գնան»,– նշել է Միլլերը։
Ըստ Պետդեպարտամենտի պաշտոնական ներկայացուցչի` հենց դրա համար է, որ պետքարտուղար Էնթոնի Բլինկենը շարունակում է ներգրավված լինել Հայաստանի և Ադրբեջանի առաջնորդների հետ բանակցություններում։ Միլլերի խոսքով` պետքարտուղարն անձամբ ներգրավված է գործընթացում` քաջալերելու կողմերին անել այդ դժվարին փոխզիջումները խաղաղության պայմանագրին հասնելու համար։
Հիշեցնենք, որ 2021 թվականին Ադրբեջանի նախագահ Իլհամ Ալիևը հայտարարեց Հայաստանի հետ խաղաղության պայմանագիր ստորագրելու պատրաստակամության մասին։ 2022 թվականի մարտին Բաքուն Երևանին փոխանցեց հարաբերությունների կարգավորման վերաբերյալ հինգ կետից բաղկացած իր առաջարկը: Հայկական կողմը շտկումներ ավելացրեց և ուղարկեց իր տարբերակը։ Այդ ժամանակից ի վեր կողմերի միջև տարբեր մակարդակներով բանակցությունների մի քանի փուլ է եղել։
Վերջին շրջանում հայ–ադրբեջանական բարձր մակարդակի հանդիպումներ են անցկացվել Վաշինգտոնում, Բրյուսելում, Մոսկվայում, Քիշնևում։
Ադրբեջանի նախագահ Իլհամ Ալիևը պարբերաբար հայտարարում է, որ խաղաղության պայմանագրի ստորագրման կարևոր պայմանը այսպես կոչված «Զանգեզուրի միջանցքի» բացումն է ու զինվորականների դուրսբերումը Լեռնային Ղարաբաղից։