ԵՐԵՎԱՆ, 27 հուլիսի - Sputnik, Խաչիկ Չախոյան. Լուկա Յուրիչիչի և Խուան Բրավոյի խփած գնդակների շնորհիվ «Փյունիկը» կամային հաղթանակ տարավ շվեդական «Կալմարի» նկատմամբ 2։1 հաշվով Կոնֆերենցիաների լիգայի որակավորման առաջին փուլում։
«Փյունիկը» շատ համարձակ սկսեց խաղը, ու հանդիպման մեկնարկում Դավիդ Դավիդյանը հարձակման աջ եզրից ներխուժեց մրցակցի տուգանային հրապարակ և վտանգավոր հարված կատարեց, բայց դարպասապահ Ռիկարդոն փրկեց իր թիմին։ Հետագայում խաղադաշտում հավասար պայքար էր ընթանում։ Ճիշտ է, մեկ անգամ էլ վտանգավոր պահ ստեղծեցին «Կալմարի» ֆուտբոլիստները, բայց խաղն ընթանում էր առանց գոլային պահերի։
Նման իրավիճակում «Փյունիկը» առաջին կեսի նախավերջին րոպեին սխալվեց, ու Յակուբ Տրենսկովը առաջ մղեց դաշտի տերերին։ Ընդմիջումից հետո սխալվելու հերթը շվեդական թիմինն էր։ 55-րդ րոպեին Յուսուֆ Օտուբանջոն, տիրելով գնդակին, այն հասցեագրեց Լուկա Յուրիչիչին, վերջինս էլ մեկ հպումով դարձավ պատասխան գոլի հեղինակ։ Պատասխան գնդակը մեծ վստահություն հաղորդեց «Փյունիկի» ֆուտբոլիստներին, որոնք հանդիպման 81-րդ րոպեին Խուան Բրավոյի հարվածից հետո առաջ անցան հաշվի մեջ։
Հայ երկրպագուների «Փյունի՜կ, Փյունի՜կ» վանկարկումների ներքո Լուկա Յուրիչիչիը կարող էր «յուղոտ վերջաբան» դնել խաղի հիմնական ժամանակին ավելացված ժամանակի ընթացքում, բայց իր թիմին հերթական անգամ փրկեց դարպասապահ Ռիկարդոն։ Անկախ ամեն ինչից Հայաստանի փոխչեմպիոնը շատ կարևոր ու գեղեցիկ հաղթանակ տոնեց։
Պատասխան հանդիպումը «Փյունիկն» ու «Կալմարը» անցկացնելու են ուղիղ մեկ շաբաթ անց՝ օգոստոսի 3-ին Հայաստանում։