ԵՐԵՎԱՆ, 27 հուլիսի – Sputnik. Հայաստանում սուր շնչառական վարակներով և գրիպով հիվանդացության մակարդակը ամռան շրջանում շարունակում է նվազել։ Եվ չնայած գրիպի հարուցիչներ չկան, երկրում ավելացել է սուր շնչառական վարակների տեսակների թիվը։ Տեղեկությունը հայտնել են ՀՀ առողջապահության նախարարությունից` պատասխանելով Sputnik Արմենիայի հարցմանը։
Այսպես` եթե մայիսին ՀՀ–ում տարածված էին ռինովիրուսն ու ադենովիրուսը, ապա այսօր դրանց զուգահեռ «պտտվում» են նաև պարագրիպն ու մետապնևովիրուսը։
Միաժամանակ գերատեսչությունից հայտնում են, որ հիվանդացության ցուցանիշի նվազում է նկատվում ինչպես Երևանում, այնպես էլ ՀՀ մարզերում:
«Արձանագրված դեպքերի 65%-ը 0-18 տարեկան երեխաներն են»,-նշել են նախարարությունում։
Ինչ վերաբերում է կորոնավիրուսին, ապա այս պահին իրավիճակը Հայաստանում, ինչպես և աշխարհի մյուս բոլոր երկրներում, կայուն է։
Առողջապահության նախարարության տվյալներով՝ Հայաստանում մինչև օրս կապիկի ծաղիկով վարակվելու ոչ մի դեպք չի գրանցվել։ Նախարարությունում կարծում են, որ Հայաստանում հիվանդության տարածման վտանգը ցածր է։
Գերատեսչությունից նաև հիշեցրել են, որ մարտից ի վեր Հայաստանում գրանցվում են կարմրուկով վարակվելու դեպքեր (կարմրուկը մեծամասամբ «բերում» են արտերկրից):
Հիշեցնենք, որ մարտի 3-ից հուլիսի 23-ը ներառյալ Հայաստանում գրանցվել է կարմրուկով վարակման ընդհանուր 338 դեպք: Վարակվածներից 232-ը երեխաներ են, 106-ը՝ մեծահասակներ։