ԵՐԵՎԱՆ, 26 հուլիսի - Sputnik. ԵԱՏՄ երկրների քաղաքացիները հոկտեմբերի 26-ից կկարողանան ինքնուրույն միգրացիոն հաշվառման կանգնել Ռուսաստանում։ Այս մասին ճեպազրույցի ժամանակ հայտարարել է Եվրասիական տնտեսական հանձնաժողովի (ԵՏՀ) նախագահի օգնական Իյա Մալկինան։
Այսպիսով, հնարավոր կլինի գրանցվել պարզեցված ընթացակարգով, բայց դրա համար հարկ կլինի անձնական հաշիվ ունենալ Ռուսաստանի Դաշնության պետական ծառայությունների միացյալ պորտալում (Госуслуги), ինչպես նաև գրանցվել նույնականացման և անձի հաստատման միասնական համակարգում (նույնպես պետծառայությունների պորտալում): Այնտեղ ԵԱՏՄ երկրներից որևէ մեկից ժամանող քաղաքացին պետք է նշի ոչ միայն իր, այլև ընտանիքի անդամների տվյալները։
Այնուհետև անհրաժեշտ է ընդունող կողմի (ռուսաստանցու) հաստատումը, որը նույնպես պետք է գրանցված լինի թե՛ «Госуслуги» պորտալում, թե Նույնականացման միասնական համակարգում։
Դրական եզրակացության դեպքում օտարերկրյա քաղաքացու անձնական օգտահաշվին կուղարկվի ժամանման ծանուցումը, իսկ ընդունող ռուսաստանցու օգտահաշվին՝ հաղորդագրություն այն մասին, որ իր հասցեով օտարերկրացի է հաշվառվել։
Այս պարզեցված կարգը նախատեսված է «Ռուսաստանի Դաշնությունում օտարերկրյա քաղաքացիների և քաղաքացիություն չունեցող անձանց միգրացիոն հաշվառման մասին» Ռուսաստանի Դաշնության օրենքում վերջերս ընդունված լրացումներով:
Եվրասիական տնտեսական միությունը միջազգային ինտեգրացիոն տնտեսական միավորում է, որը գործում է 2015 թվականի հունվարի 1-ից: Միության անդամներն են Ռուսաստանը, Հայաստանը, Բելառուսը, Ղազախստանը և Ղրղզստանը: