ԵՐԵՎԱՆ, 25 հուլիսի - Sputnik. Մարդու իրավունքների պաշտպանը մի քանի այց է կատարել «Ձորակ» հոգեկան առողջության խնդիրներ ունեցող անձանց խնամքի կենտրոն» և դրա մասնաշենքերից մեկի 1–ին հարկում գտնվող «Երևանի N 34 նախադպրոցական ուսումնական հաստատություն» ու արձանագրել մի շարք խնդիրներ։ Այս մասին հայտնում է ՀՀ ՄԻՊ մամուլի ծառայությունը։
Մասնավորապես` պարզվել է, որ մանկապարտեզը չունի առանձին սանհանգույց աղջիկների ու տղաների համար, առկա է մեկ սանհանգույց, որը չի համապատասխանում գործող օրենսդրական պահանջներին:
Պարզվել է նաև, որ որ տվյալ սանհանգույցից օգտվում են նաև աշխատակիցները՝ այլ սանհանգույցի բացակայությամբ պայմանավորված:
ՄԻՊ աշխատակիցները արձանագրել են նաև, որ «Ձորակ» կենտրոնի խնամարկյալները երեկոյան ժամերին ազատորեն դուրս են գալիս կենտրոնի տարածքից, ինչը կարող է վտանգավոր լինել ոչ միայն խնամարկյալի, այլ նաև տարածքի բնակիչների, այդ թվում՝ երեխաների համար:
«Այս առումով, հարկ է նշել, որ մանկապարտեզի աշխատակիցներն առանձնազրույցների ընթացքում հայտնել են, որ ստեղծված իրավիճակին ընտելացել են. մեջբերում՝ «...սովորել ենք՝ մենք էլ, երեխաներն էլ»»,– ասված է ՄԻՊ զեկույցում։
Արձանագրվել է նաև, որ «Ձորակ» կենտրոնում խնամք ստացող անձինք իրենց պատուհաններից առարկաներ են նետում մանկապարտեզի օգտագործման տարածք:
Բացի այդ` այցի պահին «Ձորակ» կենտրոնում խնամք ստացող իգական սեռի ներկայացուցիչն առանց վերնահագուստի 3-րդ հարկից ժեստերի միջոցով փորձում էր հաղորդակցվել բակում գտնվող անձանց հետ:
Այցի ընթացքում արձանագրվել է նաև, որ մանկապարտեզի շենքը խոնավ է և ըստ աշխատակիցների՝ արտաքին վերանորոգումն ապարդյուն է:
Արձանագրվել է, որ մանկապարտեզի շենքային և բակային պայմանները՝ որպես երեխաների իրավունքների լիարժեք իրացման անվտանգ միջավայր, պատշաճ ապահովված չեն։