ԵՐԵՎԱՆ, 20 հուլիսի – Sputnik. ՀՀ կառավարությունը «Ինտերնեյշնլ Մասիս Տաբակ» ընկերությանը 8.5 մլրդ դրամ մաքսատուրքից ազատվելու արտոնություն տվեց։ Որոշումն ընդունվեց ՀՀ կառավարության նիստում։
Նախագիծը ՀՀ կառավարությանն էր ներկայացրել ՀՀ էկոնոմիկայի նախարարությունը։
Որոշման ընդունումը պայմանավորված է «Ինտերնեյշնլ Մասիս Տաբակ» ՍՊԸ–ի կողմից գերակա ոլորտում իրականացվող ներդրումային ծրագրի շրջանակներում ներմուծվող տեխնոլոգիական սարքավորումները, դրանց բաղկացուցիչ ու համալրող մասերը, հումքը ներմուծման մաքսատուրքից ազատելու անհրաժեշտությամբ:
Արտոնություն ստանալու համար ընկերության ներկայացված ապրանքների արժեքը կազմել է 175.5 մլրդ դրամ: Ընկերության կողմից ներմուծվող հումքը նախատեսվում է օգտագործել ծխախոտի արտադրության համար։
Թողարկված արտադրանքի 80%–ը և ավելին «Ինտերնեյշնլ Մասիս Տաբակ» ընկերությունը նախատեսում է արտահանել ԵԱՏՄ և երրորդ երկրներ։
«Ներմուծվող ապրանքները չեն ներմուծվում ԵԱՏՄ անդամ-երկրներից, քանի որ չեն բավարարում ընկերության տեխնիկական պահանջներին։ Արտոնության առկայությունը լուրջ խթան կհանդիսանա նոր ներդրումային ծրագրերի իրականացման և նոր աշխատատեղերի ստեղծման, ներդրումների ներգրավման, տեղական արտադրության և արտահանման խթանման համար»,– նշված է կառավարության հիմնավորման մեջ:
Նախատեսվում է ներդրումային ծրագրի շրջանակներում ստեղծել 150 նոր աշխատատեղ՝ մինչև 807 հազ դրամ միջին ամսական աշխատավարձով։
Ծխախոտի արտադրությունն իրականացվելու է ՀՀ Մասիս քաղաքում։
Ի դեպ, ընկերությունը հիմնադրվել է 2002 թ։
Հիշեցնենք, որ 2024 թ հունվարի 1-ից Հայաստանում ծխախոտը պետք է վաճառվի սպիտակ տուփերով, որոնց վրա ոչինչ չպետք է պատկերված լինի։ Այդպես է նախատեսված 2020 թվականի փետրվարի 13-ին ընդունված «Ծխախոտային արտադրատեսակների և դրանց փոխարինիչների օգտագործման հետևանքով առողջությանը հասցվող վնասի նվազեցման և կանխարգելման մասին» օրենքով։
ԵԱՏՄ տեխնիկական կանոնակարգերով ծխախոտը պետք է վաճառվի առողջության հետ կապված վատ նկարներով։