ԵՐԵՎԱՆ, 19 հուլիսի – Sputnik. ՀՀԿ փոխնախագահ Արմեն Աշոտյանի փաստաբան Տիգրան Աթանեսյանը պատրաստվում է դիմել Մարդու իրավունքների եվրոպական դատարան։ Նա այդ մասին հայտարարեց այսօր լրագրողների հետ հանդիպման ժամանակ։
Փաստաբանը վստահեցրեց, որ իրենք դիմելու են իրավաբանական պայքարի բոլոր մեթոդներին, եթե գործը գնա դատարան, ապա կօգտագործեն նաև այդ ամբիոնը։
Արմեն Աշոտյանը երկու ամսով կալանավորվեց հունիսի 16–ին։ Նա և Երևանի Հերացու անվան բժշկական համալսարանի նախկին ռեկտոր Միքայել Նարիմանյանը մեղադրվում են բուհին պատկանող մոտ 100 հազար դոլարի գույք հափշտակելու մեջ: Նրանց մեղադրում են «Ծովասար» հյուրանոցային համալիրի քոթեջները ուռճացված գներով (հաջորդած «ատկատներով») ձեռք բերելու համար այն ժամանակահատվածում, երբ ՀՀԿ փոխնախագահը գլխավորել է բուհի հոգաբարձուների խորհուրդը:
«Արմեն Աշոտյանի քրեական գործը իրավաբանական առումով այնպիսի նոնսենս է, այնպիսի աբսուրդ է, որ կարող էր միայն խորը հոգեբուժական խնդիրներ ունեցող մարդու մտքի ծնունդ լինել։ Այս գործը քննվել էր 4 տարի, ոչինչ չգտան, արդեն գործը գնում էր կարճման, մեկ էլ հանկարծ մարդուն մեղադրանք առաջադրեցին։ Սա դասական քաղաքական հետապնդում է»,– ասաց փաստաբանը։
Աթանեսյանը վստահ է, որ Աշոտյանին կալանավորել են ոչ թե նախկին մեղքերի, այլ պարզապես շիտակ խոսքի համար։ Նա նշեց, որ անգամ Եվրոպայի ժողովրդական կուսակցությունն է հայտարարել` Աշոտյանը քաղբանտարկյալ է, ու այս փաստը ապտակ է այսօրվա իշխանություններին։
«Աշոտյանին մեղադրում են լիազորությունները չարաշահելու, վատնում և փողերի լվացում կազմակերպելու մեջ, պետք չէ իրավաբան լինել հասկանալու համար, որ վատնում նշանակում է գույքի անվերադարձ կորուստ, բայց այն անշարժ գույքը, որը ԵՊԲՀ–ն ձեռք է բերել, երբ Արմեն Աշոտյանը եղել է բուհի հոգաբարձուների խորհրդի նախագահ, մինչ այսօր պատկանում է նրանց ու երկու անգամ ավելի թանկ է»,– ասաց նա։
Խոսելով Աշոտյանի պահման պայմանների մասին` Աթանեսյանը հայտնեց, որ նա պահվում է սովորական խցում, բայց առանձին մասնաշենքում։ Այս պահին նա խցում մենակ է, բայց ցանկացած պահի այդ խուց կարող են նաև այլ կալանավոր բերել։